Lulzim Basha, i shkarkuar nga Kuvendi Kombëtar i 11 dhjetorit, ndërsa sot përballet me referendumin e anëtarësisë, ka thirrur në Tiranë, mbështetës të tij, duke pretenduar për zhvillimin e një Kuvendi, i cili nuk njihet nga mbi 4900 delegatët që ishin të pranishëm në Air Albania, 1 javë më parë.
Ndërkohë në Gjykatën e Tiranës, janë dorëzuar dy statute nga Partia Demokratike, një i Kuvendit të Korrikut 2021 dhe tjetri me ndryshimet e miratuara më 11 dhjetor. Komisioni i Rithemelimit të Partisë Demokratike i depozitoi më 15 dhjetor në Gjykatë ndryshimet statutore që u miratuar në Kuvendin Kombëtar të PD-së më 11 dhjetor, të thirrur nga ish-kryeministri Sali Berisha, me qëllim për të legalizuar çdo ndryshim të miratuar në Kuvend. Gjyqtari që u caktua për çështjen ishte Agron Zhukri, për të cilin ka raportime se është dorëhequr nga çështja, por zyrtarisht nga Komisioni i Rithemelimit nuk konfirmohet si akt. Nëse Zhukri është tërhequr, atëherë do të hidhet një tjetër short për caktimin e gjyqtarit/es që do të shqyrtojë aktet e depozituara.
Edhe Lulzim Basha, përmes mbështetësve të tij, ka depozituar tre ditë më parë në Gjykatën e Tiranës ndryshimet e bëra në statut në Kuvendin e mbledhur nga PD më 17 korrik.Dosja është në duart e gjyqtares Blerina Muça.
Të dyja palët nuk njohin statutet e njëra-tjetrës, ndërsa ditët në vijim pritet të jenë mjaft vendimtare për fatin e partisë më të madhe opozitare në vend. Pyetja që shtrohet më së shumti është ajo se kur mund t’i jepet fund situatës së krijuar në PD dhe nëse do të shmanget një përplasje lidhur me selinë e kësaj partie.
Kuvendi i thirrur nga Basha, mbi të cilin janë ngritur pikëpyetje lidhur me delegatët, në rendin e ditës ka këto pika:
Vendimmarrje mbi situatën politike, si dhe marrjen e masave për të mbrojtur interesin e Partisë Demokratike, duke mos lejuar që problemet apo interesat personale të secilit anëtar të dëmtojnë interesat elektorale dhe politike të PD, dhe axhendën e saj politike në përballjen me regjimin e Edi Ramës.
Miratimin e Aksionit Politik për të ardhmen e Partisë Demokratike dhe shpalljen e Platformës Qytetare për Demokraci, për rikthimin e legjitimitetit dhe demokracisë në vend, si dhe ndërtimin e mekanizimit të bashkëpunimit me të gjitha forcat e shoqërisë në përballjen me regjimin e Edi Ramës, i cili në aleancë me krimin e organizuar dhe korrupsionin ka shkatërruar çdo mjet të funksionimit demokratik të shtetit shqiptar dhe po nxit braktisjen masive të vendit nga qytetarët dhe kryesisht të rinjtë.
Miratimin e programit organizativ të Partisë Demokratike për të përgatitur strukturën e partisë për zgjedhjet e ardhshme, sipas objektivit “Partia Demokratike, partia e demokratëve dhe çdo shqiptari të ndershëm – Forca e vetme politike që do të sjellë ndryshimin në Shqipëri”.
Mes disa pikave të draft vendimit për çështjen e organizimit dhe thirrjen e Kuvendit Kombëtar më 18 Dhjetor ka edhe një pikë tjetër me rëndësi, që synon disiplinimin e strukturave.
“Çdo veprim apo akt tjetër, në çdo formë apo mënyrë, që bie ndesh me këtë vendim të Kryesisë së Partisë, do të përbënte dëmtim të interesave elektorale dhe politike të Partisë Demokratike.” thuhet në pikën 3 të vendimit të propozuar nga Lulzim Basha.
