Deputeti demokrat Tritan Shehu përmes një postimi në rrjetet sociale shprehet se “Ballkani i Hapur” është një projekt i vdekur, i cili lindi nga Presidenti serb Aleksandar Vuçiç, u përkrah nga Edi Rama dhe Zoran Zaev, por nuk gjeti asnjë përkrahje më tej.
Duke komentuar vizitën e paralajmëruar të Vuçiç në Tiranë në datën 20 dhjetor, Shehu shprehet se ai është një takim bilateral Rama-Vuçiç mbi rrënojat e një projekti të dështuar anti-europian që nuk i ngel tjetër, veçse të varroset.
Reagimi nga Tritan Shehu
Iniciativa “Ballkan i hapur” a “Minishengen ballkanik”, në realitet “Jugosllavia e Re”, është tashmë një projekt i vdekur. Ai lindi nga Vuçiçi, u mbështet nga Rama dhe Zaevi, duke mos gjetur asnjë përkrahje më tej.
Jo vonë dhe elektorati i Maqedonisë së Veriut e rrëzoi Zaevin, duke votuar edhe kundër këtij projekti. Kështu, kjo formë vuçiçiane “Ballkani” realisht u tret, gjë që u verifikua në takimin e fundit të Novi Sad apo në atë ”online” në Beograd, kur dhe Vuçiçi e braktisi duke zgjedhur Putinin si pjesë e Unionit EuroAsian që është. Ndërsa Presidenti i Maqedonisë së Veriut, nga Prishtina i dha “colpo di grazia”. Pra dhe ai vend, me Zaevin ish-Kryeminister, është de facto jashtë kësaj iniciative.
Takimi të hënën në Tiranë është një takim bilateral Rama-Vuçiç mbi rrënojat e një projekti të dështuar anti-europian që nuk i ngel tjetër, veçse të varroset.
Por jo në Tiranë!
“Trupi” i tij nuk ka asgjë të përbashkët me vendin tonë e aspiratën tonë europiane e perëndimore.
“Varri” i tij mund të jetë në Beograd, aty ku lindi, për reminishencat e të cilit u krijua.
Tashmë është e qartë se jo vetëm Shqipëria, por dhe Maqedonia e Veriut, vendet e rajonit, mbështesin e pranojnë si forma bashkëpunimi vetëm projektet e Brukselit si psh atë të Berlinit, të domosdoshme këto edhe për procesin tonë të integrimit.
Shqipëria nuk ka pse të bëhet pjesë as dhe “e ceremonisë mortore” të atij procesi të bazuar mbi ëndrra të vjetra nacionaliste serbe e lindore, që ishte i destinuar të vdiste që me lindjen e tij. Se për “ringjallje” as që bëhet fjalë, ai tashmë është në “vdekje biologjike”.
