Lulzim Basha, i cili u shkarkua nga funksioni i Kryetarit të PD nga Kuvendi Kombëtar i 11 dhjetorit, por që se njeh vendimin, përmes një postimi, i ka drejtuar një apel demokratëve t’i bashkohen Kuvendit të 18 dhjetorit.
Basha ka sjellë në vëmendje lëvizjen pa viza të shqiptarëve në zonën Schengen, duke e cilësuar si përmbushjen e një ëndrre për të gjithë shqiptarët.
Më 15 dhjetor 2010, kohë kur Basha ishte ministër i Brendshëm në Qeverinë e Kryeministrit Sali Berisha, u realizua edhe udhëtimi i parë pa viza drejt Brukselit, gjë që duket se po shfrytëzohet sot nga ai, në përplasjen e krijuar mes demokratëve.
“Në 15 dhjetor 2010 ne demokratët përmbushëm një ëndërr për gjithë shqiptarët, lëvizjen pa viza në Europë me fluturimin e parë drejt Brukselit.
Të rinj dhe të vjetër që e gëzojnë këtë privilegj prej 11 vjetësh tashmë duhet ta dinë se ai fluturim përfaqëson arritjen më të madhe, hapin më të madh përpara në rrugëtimin tonë drejt Bashkimit Europian, i cili fatkeqësisht me Ramën ka ngecur në vend numëro.
Në këtë ditë të bukur fare pranë Kuvendit Kombëtar të Partisë Demokratike të 18 dhjetorit, detyra jonë është të bashkohemi rreth vlerave më të mira të forcës tonë politike, ta lëmë pas të kaluarën për të zgjedhur të ardhmen që vetëm ne mund t’ia japim Shqipërisë”, shkruan Basha.
Në të njëjtën datë, Kuvendi Kombëtar i 11 dhjetorit, i cili ka ngritur edhe Komisionin e Rithemelimit të PD, ka thirrur në një referendum anëtarësinë e partisë, për të votuar për shkarkimin e Lulzim Bashës.
