Disa persona janë arrestuar lidhur me aferën e inceneratorëve. Mes tyre është dhe ish-ministri Lefter Koka.
Koka është arrestuar me urdhër të prokurorëve të SPAK, Dritan Premci dhe Vladimir Mara, pas padive për “dosjet e inceneratorëve”. Ai akuzohet për shpërdorim detyre, pastrim parash dhe korrupsion, bëjnë me dije burime nga SPAK.
Koka, ish minisër i Mjedisit dhe ish-deputet i LSI, u shkëput nga kjo parti kur dorëzoi mandatet dhe ju bashkua Partisë Socialiste.
Ish-ministri është akuzuar nga opozita si i përfshirë në “aferën e inceneratorëve”. Kallëzime nga PD dhe LSI janë dorëzuar në SPAK, ku i akuzuar ka qenë Lefter Koka, në postin e ministrit të Mjedisit.
Në kallëzimin e fundit të depozituar në SPAK nga LSI për inceneratorin e Fierit, ish-ministri i Mjedisit Lefter Koka, ish-sekretari i Përgjithshëm i kësaj ministrie, sot deputet i Partisë Socialiste, Alqi Bllako dhe kryetari i Bashkisë së Fierit, Armando Subashi u akuzuan se kanë kryer dy vepra penale, atë të ‘Shkeljes së barazisë në tendera’ dhe ‘Shpërdorimin e Detyrës’.
Akuza penale për Kokën janë ngritur edhe në paditë e depozituara në SPAK nga PD e LSI për inceneratorët e Tiranës e Elbasanit.
Lefter Koka garoi në zgjedhjen e fundit parlamentare nën siglën e PS në Durrës, fitoi mandat deputeti,por dha dorëheqjen.
