Qeveria pritet të ndryshojë Kodin Penal për të përforcuar ligjin për armëmbajtjen. Ministri i Brendshëm, Bledi Çuçi, pas mbledhjes së qeverisë, deklaroi se ministrat kanë miratuar një plan veprimi që do të rrisë kontrollin e policisë për qarkullimin dhe mbajtjen e armëve.
“Ne kemi parashikuar që të bëjmë disa ndryshime në Kodin Penal dhe kriminalizojmë trafikimin përmes kolive postare, apo posedimin e pajisjeve që mundësojnë printimin 3D të armëve. Pra, është një strategji që synon të parandalojë posedimin e këtyre armëve në mënyrë të jashtëligjshme. Policia çdo ditë bën aksione”, tha Çuçi.
Ministri paralajmëroi dhe disiplinimin e licencimit të të gjitha armëve, përfshi dhe ato të gjahut: “Miratuam planet e veprimit për kontrollin e armëve dhe municioneve për këto dy vite. Ky plan parashikon që të parandalojë posedimin e armëve pa leje në duart e civilëve, kontrollin e trafikut të armëve dhe disiplinimin e licencimit, jo vetëm luftarake, por edhe gjahut dhe agjencive private të sigurisë”.
Çuçi shtoi se me planin e ri, armëmbajta do të jetë më e rregulluar, duke rritur zbatueshmërinë e ligjit.
