Shqipëria prej disa javësh po përballet me një valë të re Covid-19, edhe pse kurba e rasteve të reja është në varësi të testimeve që realizohen, dhe është e vështirë të përcaktohet përsa kohë mund të zgjasë kjo valë.
Bazuar në të dhënat e fundit nga Ministria e Shëndetësisë, në të gjithë vendin ka 6438 pacientë aktivë, prej të cilëve 3253 raste janë në Tiranë, që rezulton edhe qarku me numrin më të lartë të pacientëve që vijojnë të jenë të infektuar.
Pas Tiranës, si qarku më i prekur është Fieri dhe më pas renditen Gjirokastra dhe Shkodra. Ndërkohë qarqet më pak të prekura renditen Kukësi dhe Dibra, edhe pse nga informacionet zyrtare që jepen çdo 24 orë nga Ministria e Shëndetësisë, nuk dihet situata reale, pasi nuk ka të dhëna mbi ndarjen e testimeve që bëhen, pra sa prej tyre bëhen në Tiranë, ku raportohet prej javësh shifra më e lartë e pacientëve aktivë dhe sa bëhen në Qarqe apo Bashki të tjera.
Ekspertë të pavarur të shëndetësisë kanë apeluar që testimet janë e vetmja rrugë për të krijuar një panoramë të qartë lidhur me ecurinë e pandemisë, ndërsa në Shqipëri ato kanë qenë të kufizuara në numër dhe sa herë ka një ulje të numrit të testimeve, aq më pas raste deklarohen.
Ndoshta kjo është arsyeja pse Shqipëria, vend ku edhe masat anti-Covid përcaktohen jo mbi të dhënat e sakta, por mbi deklaratat publike herë të Kryeministrit dhe herë të ministres së Shëndetësisë, vijon të regjistrojë shifra të larta të infektuarish, dhe sot nuk ka të dhëna nëse në vend qarkullon varnati Omicron i Covid-19.
Po ashtu Shqipëria renditet ndër vendet me nivelet më të ulëta të vaksinimeve, megjithëse janë përdorur edhe vaksinat kineze dhe ato ruse, që ende nuk kanë marrë certifikime nga EMA.
Shpërndarja e rasteve
Tiranë 3253
Fier 658
Gjirokastër 545
Shkodër 447
Durrës 363
Berat 315
Elbasan 287
Vlorë 200
Lezhë 130
Korçë 127
Dibër 69
Kukës 44
