Ish-Kryeministri Sali Berisha, i cili inicoi mbledhjen e firmave të delegatëve, për mbledhjen e Kuvendit Kombëtar të PD-së, më 11 dhjetor, ka shprehur sot mirënjohjen e thellë për transparencën e treguar me këtë proces.
Mesazhin e tij Berisha e ka shoqëruar me një video ku pasqyrohen në mënyrë të detajuar, të gjitha ato degë të PD-së nëpër Shqipëri, që i kanë shpallur emrat e delegatëve të tyre për të bërë pikërisht atë transparencë që po refuzon ta bëjë kryetari i PD-së, Lulzim Basha.
“Mirënjohje të thellë për mbi 2100 delegatët firmëtarë që deri tani kanë publikuar emrat e tyre, duke bërë të qartë si drita e diellit se Kuvendi i 11 Dhjetorit, përkundër mashtrimeve të peng-kryetarit, është thirrur dhe legjitimuar sipas statutit nga vullneti i mijëra delegatëve demokratë!
Ftoj të gjithë delegatët të bashkohen me ne në Kuvendin e Rithemelimit të Partisë Demokratike në datë 11 Dhjetor në ditën e lindjes së saj! Të bashkuar në rrugën tonë drejt fitores!”, thekson Berisha.
