Shoqata e tetraplegjikëve, personat me aftësi të kufizuara, burra, gra dhe madje edhe fëmjë në karrige me rrota, kanë protestuar sot para Parlamentit për t’i kërkuar Qeverisë dhe Kryeministrit t’i dëgjojë problemet e tyre dhe t’u akordojë pagesën e duhur 30 mijë lekë.
Kryeministri Edi Rama ka qenë i papërgatitur lidhur me situatën në hyrje të Kuvendit, atje ku policia po tentonte të largonte protestuesit për ti hapur rrugën Kreut të Qeverisë. Përballë një situate të tillë, në prani edhe të kamerave dhe gazetarëve, Rama është detyruar të ndalet për pak minuta, të dëgjojë nga goja e tetraplegjikëve, se institucionet e shtetit kanë heshtur para kërkesave, ndërsa ka premtuar se një ministre do të diskutojë me ta.
“Tani do të futeni në ambientet e Kuvendit dhe do të takoni Ministren e Shëndetësisë! Mos rrini në shi. A e keni marrëveshjen me vete?! Ministrja do t’ju presë dhe më pas do të komunikoj unë me të”, iu drejtua Rama.
Në fakt, për të takuar protestuesit ka dalë ministrja e Financave, ndërsa ajo e shëndetësisë, Ogerta Manastirliu, ka vijuar fjalimin e saj për vaksinat anti-Covid.
Pas takimit disa minutësh me ministren e Financave, tetraplegjikët morën një premtim, që ditën e premte, kërkesat e tyre mund të nisin të zgjidhen.
E gjithë kjo situatë tregon atë se si funksionon një Qeveri, ku çdo gjë kthehet në një propagandë, kur në fakt deri më sot kërkesat e tyre kanë përfunduar në koshat e plehrave të ministrave.
