Partizani mbylli fazën e parë në Superligë me vetëm nëntë pikë pas po kaq javësh. “Demat” e Ilir Dajës kanë vendosur një “rekord” negativ, duke bërë nisjen më të dobët të sezonit qysh pas rikthimit në elitë në sezonin 2013-14.
Tanimë në kampin e të kuqve është koha për reflektim dhe kthesë, me ndeshjen e radhës që do jetë me kampionët në fuqi të vendit. Ndaj Teutës të premte në Elbasan punë bëjnë vetëm tri pikët, me klimën te të kuqtë që nuk është ajo e duhura.
Gabimet e drejtuesve me kontratat, largimi i shumë lojtarëve që përbënin boshtin e ekipit dhe dëmtimet në këtë nisje sezoni, kanë bërë që për momentin të kuqtë të jenë në vendin e tetë me nëntë pikë.
Kjo është nisja më e dobët e një sezoni edhe nga momenti që në presidencë ka ardhur Gaz Demi. Vetëm një fitore në këto javë, është shumë pak për pretendimet e Partizanit.
