Fluks të shtruarish në spitalin Infektiv. Kështu ka nisur kjo javë lidhur me personat që kanë kërkuar ndihmë spitalore, ndërsa janë prekur nga Covid-19.
Nga raportimet mësohet se mëngjesi i sotëm në spitalin Infektiv ka qenë i ngarkuar për shkak të numrit të lartë të ambulancave që kanë transportuar për ndihmë të specializuar mjekësore pacientët e prekur nga koronavirusi.
Megjithëse nuk jepen shifra, nga burimet spitalore mësohet se ka pasur një fluks më të lartë shtrimesh këtë mëngjes se të paktën 10 ditët e fundit.
Një ditë më parë, Ministria e Shëndetësisë raportoi se në spitalet Covid po trajtohen 157 pacientë, 14 prej të cilëve ishin në gjendje të rënduar. Ndërkohë që numri i personave aktivë me Covid 19 në rang vendi është 8036, gjysma e të cilëve janë në Tiranë.
