Një person i cili akuzohet se shpërndante kokainë në doza, u arrestua në Durrës.
Policia njoftoi se u sekuestruan dhjetëra doza me kokainë, një shumë në euro dhe lekë dhe sende të tjera që shërbenin për peshimin dhe paketimin e lëndës narkotike në doza.
“Specialistët e Seksionit për Hetimin e Narkotikëve, bazuar në informacionet e grumbulluara në rrugë operative për një shtetas që shpërndante kokainë në doza, në disa zona të qytetit të Durrësit, në bashkëpunim me Forcën Operacionale në DVP Durrës finalizuan operacionin policor të koduar ‘Pista’. Në kuadër të këtij operacioni u bë kapja dhe arrestimi në flagrancë i shtetasit L. K., 39 vjeç, banues në Durrës”, njoftoi policia.
“Gjatë kontrollit fizik ndaj këtij shtetasi dhe më pas në banesën e tij, shërbimet e Policisë gjetën dhe sekuestruan në cilësinë e provës materiale një sasi lënde narkotike e dyshuar kokainë, një pjesë e saj e ndarë në doza gati për shitje, 408.800 lekë të rinj, 1085 euro, dy peshore elektronike dhe sende të tjera që shërbenin për paketimin e lëndës narkotike në doza”, shtuan të njëjtat burime.
I arrestuari akuzohet për veprën penale “Prodhimi dhe shitja e lëndëve narkotike”.
