Banorët e lagjes “5 Maji” kanë dalë sërish në protestë, këtë herë para bashkisë së Tiranës.
Banorët ankohen se Bashkia nuk i ka pranuar shkresën të cilën tentuan ta dorëzonin sot në këtë institucion.
Në shkresë, banorët refuzojnë vendimin e bashkisë për shembjen e banesave tyre të prekura nga tërmeti, pasi e quajnë të padrejtë shembjen e shtëpive të tyre pa pasur në dorë një kontratë që u garanton një çati mbi kokë.
Sipas banorëve, atyre u është hequr e drejta për tu ankuar, pasi nuk dinë se ku të shkojnë tjetër, pasi Bashkia nuk i pranon.
“I kemi drejtuar ankesën presidentit, kryeministrit, ambasadës amerikane me postë. Ndërsa në Bashki donim ta dërgonim personalisht, nuk na i pranuan ankesat. Këta u japin urdhër punonjësve që mos u pranojnë ankesat e banorëve. Të vijë Erion Veliaj ta provojë me ne. Të vijë ta provojë, do i prishë apo nuk do i prishë banesat tona. Na u tha se do marrim shërbimin te njesia administrative nr 8. Po luajnë lojë fjalësh. Nuk na jep të drejtën, që të bëjmë ankesë. Ku ta çoj shkresën unë,nëse nuk ma pranon bashkia. Është turp, nuk na lenë të drejtën as të ankohemi”, shprehen banorët e lagjes “5 Maji”.
