Një shpërthim ka ndodhur në Shosh të Shkodrës këtë të Hënë. Shpërthimi ka ndodhur në një lokal në pronësi të Gjin Gurit dhe nuk raportohet për të lënduar.
“Në sallën operative të DVP Shkodër është marrë njoftim se në buzë të rrugës që të çon në Malin e Shoshit, Njësia Administrative Shosh, Bashkia Shkodër, në lokalin e shtetasit Gjin Guri, ka ndodhur një shpërthim i vogël”, njoftoi policia.
Sipas të njëjtave burime, dyshohet se shpërthimi është shkaktuar “nga lëndë plasëse artizanale”, ndërsa nuk ka të lënduar, por janë shkaktuar dëme materiale.
Grupi hetimor dhe shërbimet e Policisë janë nisur për në vendngjarje, shtuan të njëjtat burime.
