Tom Doshi ka hequr dorë nga mandati i deputetit pas 25 prillit, por ky vendim duket se nuk ka ndërprerë procesin e verifikimit ndaj tij nga Sektori i dekriminalizimit në Prokurorinë e Përgjithshme. Përmes një njoftimi zyrtar, Prokuroria e Përgjithshme njoftoi se ka përfunduar procesin e verifikimit për Tom Doshin, ndërsa gjetjet e organit të akuzës janë dërguar në KQZ.
Verifikimet ndaj Doshit kishin nisur përpara se ai të hiqte dorë nga mandati i siguruar në zgjedhjet e 25 Prillit.
Për rastin Doshi, u raportua se Prokuroria mori të dhëna dhe nga Ambasada amerikane, për shkak të shpalljes së tij i padëshirueshëm në SHBA, së bashku me familjen e tij.
Njoftimi i prokurorisë:
Sektori i Dekriminalizimit prane Prokurorisë së Përgjithshme ka miratuar rezultatet e verifikimit për subjektin Tom Gjek Doshi dhe ia ka përcjellë sot më 04.11.2021 Komisionit Qendror të Zgjedhjeve, i cili si organ kompetent në zbatim të nenit 12 e 13 të Kreut V të Vendimit të Kuvendit nr.17/ 2016, duhet të shqyrtojë nëse janë evidentuar të dhëna që përfshihen në sferën e kufizimeve të ligjit nr. 138/2015 “Për garantimin e integritetit të personave që zgjidhen, emërohen ose ushtrojnë funksione publike”, dhe në vijim të vlerësojë nëse ato janë brenda periudhës së ndalimit të përcaktuar në po këtij ligji.
