KPA ka kthyer në detyrë prokurorin e Tiranës, Ndini Tavani, i cili u me një vendim 2 me 1 u shkarkua nga Komisioni i Pavarur i Kualifikimit rreth dy vjet më parë.
Por KPA me vendim të formës së prerë ka rikthyer prokurorin Ndini Tavani në detyrë, edhe pse ai vendimi i KPK i ndërpreu rrugëtimin drejt SPAK.
“Trupi gjykues i Kolegjit të Posaçëm të Apelimit, i përbërë nga Ina Rama kryesuese, Albana Shtylla relatore, Ardian Hajdari, Natasha Mulaj, Sokol Çomo anëtarë, shpalli vendimin për çështjen (JR) nr.2/2020, datë 09.01.2020, që lidhet me ankimin e subjektit të rivlerësimit Ndini Tavani kundër vendimit të Komisionit të Pavarur të Kualifikimit nr. 199, datë 11.10.2019. Në përfundim të gjykimit në dhomë këshillimi, trupi gjykues, bazuar në nenin 66, pika 1, shkronja “b” e ligjit nr.84/2016, “Për rivlerësimin kalimtar të gjyqtarëve dhe prokurorëve në Republikën e Shqipërisë”, në mënyrë unanime, vendosi:
1. Ndryshimin e vendimit të Komisionit të Pavarur të Kualifikimit nr. 199, datë 11.10.2019, që i përket subjektit të rivlerësimit Ndini Tavani dhe konfirmimin e tij në detyrën e prokurorit në Prokurorinë pranë Gjykatës së Rrethit Gjyqësor Tiranë.
2. Ky vendim është përfundimtar dhe ka efekt të menjëhershëm.
U shpall sot, në Tiranë, më datë 03.11.2021”, thuhet në njoftimin zyrtar të KPA.
Por çfarë ndodhi dy vite më parë me prokurorin, i cili ishte kandidat për në SPAK?
Një trupë gjykuese e KPK e përbërë nga Alma Faskaj kryesuese, Brunilda Bekteshi relatore dhe Roland Ilia anëtar, vendosi me shumicë votash shkarkimin nga detyra të prokurorit Ndini Tavani.
Madje sipas KPK-së prokurori kishte probleme për të tre kriteret e rivlerësimit dhe i ka kaluar subjektit barrën e provës.
Tavani ka dhënë shpjegimi për problemet e konstatuara nga hetimi administrativ dhe ka kërkuar konfirmimin në detyrë. Shpjegimet e dhëna nga prokurori kanë bindur vetëm një anëtar të trupës gjykuese të KPK-së, pasi dy anëtarët e tjerë kanë vendosur për shkarkimin nga detyra të prokurorit.
Vendimi i KPK, tashmë i rrëzuar nga KPA, në atë periudhë duket se ka ndikuar edhe në përbërjen e SPAK, pasi prokurori Tavani ishte një nga 22 emrat e listuar si kandidatë për prokuror të SPAK
“Dëshiroj që në Shqipëri të sundojë ligji dhe SPAK është rrugëtimi im”, u përgjigj prokurori Tavani, gjatë seancës dëgjimore në KLP, kur përzgjidheshin prokurorët e Prokurorisë Speciale.
Por, një trupë nga KPK, e përbërë nga emra për të cilët janë hedhur akuza publike, vendosi që të njollosë prokurorin Tavani, me shpresën se do e largojnë nga sistemi. Në fakt arritja e vetme e trupës së KPK në atë kohë ishte që nuk lejuan Ndini Tavanin të vijonte rrugën drejt SPAK, dhe ky duket se ishte qëllimi i atij vendimi.
Për ta kuptuar më mirë, Tavani u shkarkua për 2.5 milionë lekë, prej të cilave vetë KPK tha se 1.6 milionë lekë ai i justifikonte.
Ndini Tavani është diplomuar si magjistrat me nota të shkëlqyera dhe nga viti 2003 deri në 2004, ai ushtroi profesionin e avokatit. Pikërisht prokurori u shkarkua për lekët gjatë punës si avokat, për shumën e 2.5 milionë edhe pse në fakt për 1.6 milionë lekë prokurori kishte fatura tatimore që nuk i ishte shmangur detyrimeve tatimore.
Ai u vlerësua nga ILDPKI me kartonin jeshil në aspektin e pasurive, por KPK dukej se kishte vendosur për të shkarkuar Tavanin.
KPK ngriti dyshime për prokurorin se mund të kishte shpërdoruar detyrën gjatë hetimit të disa personave për ngritjen e skemave mashtruese. Një rast ekzemplar kur një trupë vetting merrte edhe rolin e prokurorit dhe atë të gjykatësit.
Prokurori i çmoi këto gjetje si të pabazuara, por dy nga anëtarët e KPK dukej se e kishin paravendosur se çfarë do të bënin me Ndini Tavanin.
Në fund ata vendosën që të largojnë prokurorin, por së paku sot pas dy vjetësh duhet të ndjehen të turpëruar.
