Në Komisionet Parlamentare vijon diskutimi lidhur me projektbuxhetin e vitit 2022, ndërsa opozita po shpreh kritika lidhur me shpenzimet e larta, pjesa më e madhe e të cilave po shkojnë drejt koncensioneve.
Në Komisionin Parlamentar për Arsimin, ku e pranishme ishte ministrja Evis Kushi, deputeti demokrat Agron Gjekmarkaj, shprehu shprehu shqetësimin për pagat e ulëta të pedagogëve dhe tarifat e larta të studentëve.
“Shqipëria ka tarifa tepër të larta për studentët në krahasim me mundësitë ekonomike të vendit, si dhe paga shumë të ulëta për pedagogët, të cilët detyrohen të bëjnë nga 2-3 punë për të blerë libra apo për të udhëtuar për seminare akademike”, tha Gjekmarkaj.
Por, ministrja Kushi ka hequr përgjegjësine, duke hedhur “topin” te Universitetet lidhur me pagat e pedagogëve.
Ajo tha se ndërsa janë ulur tarifat për studentët, paga e pedagogëve është në dorën e vetë universiteteve me ligjin e ri që i jep autonomi Arsimit të Lartë.
Pjesë nga debati
Agron Gjekmarkaj: Meqenëse vijmë nga një ambient i përbashkët që është mjedisi universitar, dikur duhet të kemi patur një shqetësim të përbashkët, mbi rrogat e pedagogëve. Kam pritur që ju vetë do të investoheshit më shumë në këtë, rrogat e pedagogëve janë të vogla, referencë së paku duhet të ishte Kosova. Ju e dini shumë mirë që me aq pak nuk blen dot libra.
Për të bërë konferenca ndërkombëtare dhe për të udhëtuar për një pedagogë është shumë e vështirë për të mos thënë e pamundur. Do të duhet të bëjnë nga dy tre punë dhe kur bën nga dy tre punë bie cilësia e mësimdhënies. Jam detyruar vetë të bëj dy tre punë, përpara se të vija këtu. Ky është një problem që pedagogët presin shumë më tepër.
Kampuset e premtuara gjatë kohës kur ishte revolta studentore, desha të di sa prej tyre janë ndërtuar dhe sa prej tyre janë në kantier në ndërtim e sipër. Dhe e fundit është çështja e tarifave studentore që nuk përputhen me mundësinë ekonomike të vendit, qoftë edhe në vende fqinje si Italia janë më të ulëta se tarifat e Tiranës, që unë e di shumë mirë që janë tepër të larta.
Kushi: Atëherë për pagat e pedagogëve dhe unë e ndaj shqetësimin me ju, por me ligjin e ri të Arsimit të Lartë përmes autonomisë institucionale u jep të drejtën universiteteve që të rrisin pagat dhe shpërblimin për pedagogët nëpërmjet senateve akademike.
Shumë shpejt unë kam një takim me të gjithë rektorët e universiteteve dhe kjo do të jetë një nga çështjet e radhës që ne do ta diskutojmë bashkarisht.
Për sa i takon kampuseve, unë e përmenda në fjalën time, projektet që janë aktualisht në Tiranë, por tani e kemi parë që dhe në Shkodër, Korçë, Elbasan dhe Vlorë rezidencat universitare janë të gjitha të rikonstruktuara. Në fillim të këtij viti kam patur kontakt me të gjitha universitetet dhe të gjitha rezidencat janë të aktive dhe pjesa më e madhe e tyre janë me standartet më të mira europiane.
Edhe për tarifat e dimë shumë mirë që janë përgjysmuar. Në krahasim me rajonin ne kemi tarifat më të ulëta, përveç Kosovës, e cila tashmë ka kaluar në zero tarifa për Arsimin e Lartë, ne kemi bërë hapa shumë të mirë duke i përgjysmuar tarifat, por studentët ekselentë dhe studentët me vështirësi ekonomike jo vetëm që janë të përjashtuar nga tarifat, por marrin edhe bursë.
