Deputeti i Partisë Demokratike, Agron Gjekmarkaj kërkoi nga kreu i Grupit Parlamentar i PS-së, Taulant Balla të kërkojë ndjesë ndaj protestuesve që morën pjesë në protestën e 24 janarit, i cili i cilësoi si lapanjozë.
Nga Kuvendi, ai theksoi se qytetarët u ngritën në protestë për skandalet që kanë përfshirë qeverinë, për korrupsionin si edhe tentativat për të penguar drejtësinë si në rastin e Belinda Ballukut, zëvendës kryeministres dhe ministres së Infrastrukturës dhe Energjisë, të marrë të pandehur për shkelje të barazisë në tendera.
“Nuk mund të merrni urdhër nga salla se i prishet qejfi Taulant Ballës, dhe të mbyllni seancën për 5 minuta, kur ai fyeu protestuesit, opozitarët me term të pahijshëm dhe meriton ndëshkim nga kryetari i Grupit të PS një ndjesë publike. Nuk mund t’i quash lapanjozë protestuesit, kjo është gjuha që ka përdor Ramiz Alia dhe Xhelil Gjoni ndaj shqiptarëve që hynë në ambasada.
Duhet të njihni arsyet se pse protestuesit reaguan dhe u ngritën kundër dhe u përballën me gaz lotsjellës, makina ujë dhe dhunë nga ana e policisë. Janë skandalet, korrupsioni, pengimi ndaj drejtësisë, Gysi që iu rreh ministrat e deputetët dhe sekser i shtetit, që ka ngritur shqiptarët në protestë. Ndaj zoti Balla, si parlamentar i vjetër, duhet të kërkoni ndjesë ndaj shqiptarëve që protestuan dhe u fyet dhe opozitarët që u provokuan në këtë sallë. “, u shpreh deputeti.
