Deputeti i Partisë Demokratike, Oerd Bylykbashi, i ftuar në emisionin ‘Drejt’ ka komentuar mbledhjen e Kuvendit Kombëtar, për të cilin ish-Kryeministri Sali Berisha njoftoi nga Foltorja e fundit që zhvilloi në Lezhë, se do të mbahet më 11 dhjetor.
Bylykbashi deklaroi se kryetari i partisë e ka për detyrë që të marrë pjesë sa here që Kuvendi mblidhet.
“Lulzim Basha e ka për detyrë të jetë në Kuvend. Ai nuk është delegat i thjesht, është kryetar i partisë. Por nëse nuk do jetë, është njësoj si të mos jetë një anëtar i thjeshtë”, tha ai.
Por i pyetur se çfarë ndodh nëse Basha i qëndron deri në fund strategjisë për ta injoruar dhe mosnjohur procesin final të “Foltores”, ai tha se Kuvendi i merr vendimet edhe pa prezencën e Bashës, sipas statutit të saj.
“Kuvendi i merr vendimet pa prezencën e Kryetarit se nuk është e nevojshme. Kryetari i partisë e pëlqen apo nuk e pëlqen zhvillimin e Kuvendit, Kuvendi do të mblidhet pasi thirrje është bërë për ndryshimin e statutit”, deklaroi deputeti i PD-së Bylykbashi.
