Banorët e rrugës 5 maji, banesat e të cilave mund të shemben, kanë kërkuar nga deputetët e opozitës që të bllokojnë foltoren e Parlamentit. Një prej banorëve tha se deputetët e opozitës nuk duhet të lejojnë zhvillimin e seancës parlamentare.
“Na keni me vete atje, por ju bllokoni foltoren e Kuvendit”, iu drejtuan banorët deputetit Agron Gjekmarkaj, i cili kishte shkuar të takohej me ta. Banorët kanë kërkuar nga Kryeministri Edi Rama dhe kryebashkiaku Erion Veliaj që të ndalin projektin e shembjes së banesave të tyre, ndërsa kanë paralajmëruar përshkallëzim të veprimeve.
Banorët e rrugës 5 maji prej kohësh kundërshtojnë një projek për shembjen e banesave të tyre dhe ndërtimin e pallateve në këtë zonë. Bashkia e Tiranës ka përdorur tërmetin e 26 nëntorit për të realizuar një seri shembjesh me pretendimin se banesat janë të dëmtuara. Ndërkohë banorët thonë se banesat e tyre nuk kanë pësuar dëmtime.
