Laçi është tronditur nga krimi mëngjesin e sotëm. Ish-polici Xhelal Reçi, 61 vjeç, është ekzekutuar më armë zjarri në orën 07:23 sapo doli nga makina e tij tip ‘Benz’ për të hapur bizneset e tij. Ai kishte në pronësi një butik dhe një bar kafe në qendër të Laçit.
Në momentin që është qëlluar, Xhelal Reçi ka tentuar të largohet për t’u mbrojtur pas biznesit të tij, por nuk ka mundur dot t’i mbijetojë plagëve dhe ka humbur jetën. Xhelali njihej si njeri i urtë dhe i qetë. Mendohet se autorët e kanë ruajtur dhe vëzhguar prej ditësh 61-vjeçarin para se ta vrisnin atë.
Pak minuta pas vrasjes në Milot është gjetur dhe një makinë e djegur, që mendohet se është përdorur nga autorët.
Xhelal Reçi dyshohet se është ekzekutuar për shkak të problemeve të djalit të tij, Besnikut, të cilit një vit më parë i është bërë një atentat gjatë kohës që po lëvizte me familjen e tij. Ngjarja ndodhi në gusht të 2020, ku Besnik Reçi ishte në makinë bashkë me familjen e tij, bashkëshorten dhe dy fëmijët e mitur, kur u qëllua nga dy persona që lëviznin me motor. Fatmirësisht nga plumbat nuk mbeti njeri i lënduar, ndërsa ngjarja nuk është zbardhur as sot.
Besnik Reçi njihej si një person problematik, dhe sipas raportimeve nga koha që i është bërë atentati, ka qëndruar pothuajse i fshehur dhe nuk ka lëvizur në ambiente të hapura.
Duket se kjo është edhe pista kryesore që policia është përqëndruar për zbardhjen e ngjarjes.
