Zbardhen detaje nga marrëveshja e sotme mes maxhorancës dhe opozitës për rregulloren e Komisionit Hetimor për zgjedhjet e 25 prillit. ‘BalkanWeb’ ka mësuar detaje se si u arrit marrëveshja në fjalë, ndërsa thuhet se ka pasur bisedime mes palëve. Të njëjtat burime sqarojnë për ‘Balkanweb’ se ka pasur diskutime mes kreut të grupit parlamentar të PS-së, Taulant Balla dhe Alfred Rushajt, kryetari i grupit të PD-së, për të arritur te kjo marrëveshje.
Burimet sqarojnë se debati për rregulloren është zgjidhur pas diskutimeve në Konferencën e Kryetareve. Duket se formula për zgjidhjen e ngërçit ka ardhur nga demokratët, të cilët i kanë paraqitur maxhorancës rregulloren e Komisionit të dikurshëm Parlamentar, e cila rezultoi se ishte e njëjtë me atë që po përdoret sot.
Kujtojmë se PS kërkonte që kërkesat për marrjen e provave dhe të dëshmitarëve të votoheshin nga anëtarët e këtij komisioni.Por kjo gjë nuk është pranuar nga opozita, e cila e ka cilësuar shkelje ligjore. Po sot, pas 6 mbledhjeve me debate e mosmarrëveshje maxhorancë-opozitë, në Komisionin Hetimor për Zgjedhjet e 25 prillit u zgjodh dhe sekretari i komisionit.
