Arben Ahmetaj po shfaqet prej kohësh si “ylli” në ngjitje i Rilindasve, madje duke zbehur edhe disa figura të tjera të rradhët e socialistëve.
Nga momenti kur Kryeministri Edi Rama i besoi rindërtimin nga tërmeti apo më tej edhe vaksinat, “tigri” i Qeverisë ka njohur vetëm rritje.
Madje, arriti t´i marrë pozicionin në Qeveri edhe një socialisti si Erion Braçe, edhe pse ky i fundit pavarësisht ndonjë zhurme të vogël që shkaktonte në rrjetet sociale me cicërima apo postime, ishte i bindur po aq sa të tjerët në raport me Kryeministrin.
Por duket se Ramës nuk i pëlqente mënyra se si Braçe, firmoste vendimet e Qeverisë, ndaj në një moment vendosi që ato të nënshkruheshin nga “tigri”, i konsideruar në rrethet e socialistëve si një eminencë gri, të cilit më parë i kishte besuar edhe Fatos Nano.
Së fundmi ai ka menduar që postit të ri në Qeveri, menaxhimit të fondeve të tërmetit dhe atyre të makinave, i shkon një makinë luksoze, një automjet me peshë, brenda të cilit do të udhëtojë “tigri”.
Në rrjetet sociale qarkullon pikërisht fotoja e kësaj makine, që sipas postimeve kushton 70 mijë euro. Nuk dihet nëse fondi për blerjen e makinës i përket atyre të rindërtimit apo vaksinave, pasi vështirë të besosh se në një kohë krize, sikundër ka thënë edhe Kryeministri, të cilin nuk e zë gjumi nga hallet e shqiptarëve, të jenë përdorur para nga buxheti.
Gjithsesi ajo që ka rëndësi është që “tigri” do të shfaqet kudo me makinën e tij të re…
