Ylli Manjani, ish-ministër i Drejtësisë, dhe një nga kritikët e Edi Ramës dhe Lulzim Bashës, përmes një postimi në rrjetet sociale, ka ironizuar svrisht nismën për vettingun e politikanëve, që e konsideron neokomunizëm.
Referuar rekomandimit nr 14 të Raportit të OSBE/ODIHR, Manjani shprehet se “ligji nuk mund të ndalojë kandidimin e askujt që nuk është dënuar me vendim të formës së prerë”.
“Ky është rregulli bazë në çdo demokraci. Pra edhe ligji i Lulit për dekriminalizim në këtë pjesë ka rënë.
Bota demokratike flet për demokraci dhe jo neokomunizma! Se në fakt, siç edhe e kemi thënë, nuk ka dekriminalizim duke kriminalizuar njerëz me zor!
Nuk kriminalizohen njerëzit për jetë me ligje politike. Aq më pak pa vendime dënimi të gjykatave!”, shkruan Manjani.
Postimi nga Ylli Manjani
Raportin e ODIHR, PS nuk e lexon se nuk ka interes. Por PD nuk e lexon deri në fund. Nejse.
Por rekomandimi me nr 14 i këtij Raporti thotë se ligji nuk mund të ndalojë kandidimin e askujt që nuk është dënuar me vendim të formës së prerë.
Edhe sikur të kesh qenë ose je i arrestuar, apo i deportuar nga një vend tjetër, prap nuk të hiqet e drejta për të kandiduar. Rrjedhimisht nuk ka më debat për legjitimitetin e mandatit të marrë në këto kushte. Sepse votën e popullit nuk ka sesi ta transferojë ligji.
Ky është rregulli bazë në çdo demokraci.
Pra edhe ligji i Lulit për dekriminalizim në këtë pjesë ka rënë.
Bota demokratike flet për demokraci dhe jo neokomunizma!
Se në fakt, siç edhe e kemi thënë, nuk ka dekriminalizim duke kriminalizuar njerëz me zor!
Nuk kriminalizohen njerëzit për jetë me ligje politike. Aq më pak pa vendime dënimi të gjykatave!
