Të tjera detaje janë publikuar lidhur me krimin e rëndë që tronditi mbrëmjen e së shtunës Fierin, ku u vra një 57-vjeçar.
Demir Backa u qëllua për vdekje nga një automjet në lëvizje, ndërsa viktima ndodhej në një automjet të parkuar, pranë lokalit që kishte në pronësi në Fier.
Në makinën e djegur në vendin e quajtur Daullas në Bay-pass e cila ishte e tipit ‘C Class’ me portobagazh policia ka gjetur 2 armë zjarri që dyshohet se janë përdorur për krimin, një kallashnikov dhe një pistoletë, të cilat janë çuar në laborator për ekzaminim. Ndërkohë, në vendin e ngjarjes janë sekuestruar 16 gëzhoja.
Sipas raportimeve, që i referohen hetimeve paraprake, dyshohet se atentati mafioz është kryer për hakmarrje.
Policia është përqendruar në të shkuarën e Demir Backës, konfliktet e mundshme që mund të ketë pasur në Fier, veçanërisht në muajt e fundit.
Nga kamerat e sigurisë ka rezultuar se në atentat kanë marrë pjesë 2 persona. Viktima është vëllai i ish-anëtarit të bandës së Fierit, Medi Backës, i cili është vrarë në 1997-ën.
