Shoqata e Transportit Publik paralajmëron reduktim të mëtejshëm të shërbimit të transportit urban, nëse qeveria nuk merr masa.
Në një dalje për media, përfaqësues të shoqatës thanë se kanë kërkuar indeksim të çmimit. Ata i bënë thirrje bashkisë dhe qeverisë që të ulen në tryezë e të gjejnë një zgjidhje, pasi në të kundërt do të falimentojnë.
“Ne kemi kërkuar indeksimin e çmimit, që të shohim se ku janë të ardhurat e shërbimit të transportit. Kemi të ardhura vetëm nga bileta. Duhet të ulemi e të shohim një gjuhë të përbashkët për plotësimin e kërkesave, që të mos shkojmë te rritja e çmimit. Duhet ta kuptojnë të gjithë se ne nuk jemi në luftë me bashkinë apo qeverinë, por duam të ulemi në tryezë të përbashkët, pasi nëse nuk merren masa, do shkojmë drejt falimentimit. Rritja e çmimit të naftës ka ndikuar direkt në të ardhurat e shërbimit të transportit. Ne e kishim paralajmëruar reduktimin prej kohësh, nëse nuk merreshin masa, dhe do të shkojmë akoma më tej në reduktim”, u shpreh përfaqësuesi i Shoqatës së Transportit.
