Jasir Asani ishte një nga lojtarët që u largua në merkaton e verës nga Partizani. Një nga futbollistët më të mirë të sezonit të shkuar duket se ka lënë shumë mangësi në ekipin e kuq.
Edhe pse drejtuesit kryeqytetas ndërhynë duke bërë disa afrime, cilësitë e mëngjërashit duken se mungojnë shumë në organikën e trajnerit Ilir Daja. 26-vjeçari u transferua te Kisvarda në Hungari, skuadër me të cilën nuk po arrin të gjejë hapësira.
Kjo duket se ka krijuar dhe pakënaqësi te futbollisti i cili në Shqipëri ishte më i miri në pozicionin e vet. Merkato e janarit dalëngadalë po afron dhe marrëdhënia mes tij e Gaz Demit vijon të jetë mjaft pozitive. Nuk do të ishte habi nëse Asani do të bënte sërish “prapa-kthehu” për të ardhur dhe kontribuar te 16-herë kampionët e Shqipërisë. Ndoshta në formë huazimi ashtu siç ndodhi me Sherif Kallakun te Teuta.
