Shefja e Epidemiologjisë në ISHP, Silva Bino, u është drejtuar me një apel sot studentëve që të vaksinohen, në të kudërt do t´u duhet të paraqesin çdo javë një test negativ PCR për të provuar se nuk janë bartës të koronavirusit.
“Të rinjtë mund të vaksinohen fare mirë, qoftë me vaksinën kineze dhe Pfizer”, thotë ajo.
Ndërkohë Bino sqaron të rinjtë rreth shqetësimeve që i bëjnë ata hezitues ndaj vaksinimit.
“Nuk ka asnjë ndikim vaksina në shëndetin riprodhues. Të gjitha këto kanë qenë diskutime të hamendësuara,” thekson Bino.
Po studentët të cilët kanë kaluar sëmundjen a duhet të vaksinohen për tu futur në auditore?
“Nëse e kanë kaluar dhe janë brenda 1-3 muaj, mund të mos jenë të vaksinuar, por të testohen,” thotë ajo.
Sot ka pasur një reagim të fortë të studentëve lidhur me vaksinimin me detyrim që po tenton të aplikohet në Shqipëri duke e kushtëzuar pjesëmarrjen në auditore pikërisht me vaksinat.
Nga ekspertë të pavarur të shëndetësisë është kërkuar që shteti të marrë përsipër testet falas për studentët që nuk duan të bëjnë vaksinat, aq më tepër kur në masë aplikohen vaksinat kineze. Nuk dihet sepse Shqipëria vijon të aplikojë vaksina të pacertifikuara nga EMA dhe CDA, ndërkohë që propaganda vijon të paraqesë si suksese arritjen e marrëveshjes për miliona vaksina të siguara nga PFIZER.
