“Tifozët miq provokuan incidentet në ndeshjen kualifikuese Shqipëri-Poloni”. Ky ishte qëndrimi zyrtar i Federatës së Futbollit, që u shoqërua me reagime të ashpra në Poloni.
Pas asaj deklarate për media, për ngjarjet në Arenën Kombëtare foli Armand Duka. Kreu i FSHF-së nuk i përmendi tifozët kundërshtarë, por e shpërndau fajin te të gjithë, nga organizatorët e deri te spektatorët.
“Ngjarje me të vërtetë e turpshme, që nuk na nderon, njollos futbollin, por që të gjithë ne duhet të ndjejmë përgjegjësi, të nxjerrim mësime dhe të përmirësohemi për të ardhmen dhe jo të drejtojmë gishtin nga njëri-tjetri, pasi të gjithë ne jemi fajtorë, që nga ne si organizatorë, ata që duhet të na ndihmojnë apo tifozët në shkallët e stadiumit. Është vërtetë mëkat kur 22000 tifozë në stadium krijuan një atmosferë shumë të mirë, por nga disa individë të njollosemi apo të penalizohemi”, u shpreh Duka.
Shqipëria pret ndëshkimet e disiplinorit të FIFA-s, ku parashikohet gjobë rreth 180 mijë euro, si edhe rrezikohen dy deri në katër ndeshje pa tifozë.
