Policia italiane arrestoi 4 shqiptarë të moshave 29 deri në 39-vjeç.Ata dyshohet se janë pjesëtarë të një organizate të shpërndarësve të kokainës, që funksiononte prej më shumë se një viti e gjysmë midis jugut të Marche dhe veriut të Abruzzo.
Operacioni për shkatërrimin e organizatës u zhvillua nga policia e Ascoli dhe Teramo.
Të paktën 80 raste janë dokumentuar që shqiptarët ishin furnizues të personave të varur nga droga. Shkëmbimi bëhej kryesisht në parkimet e qendrave tregtare, që ishin funksionale edhe gjatë bllokimit të Covid-19.
Shqiptarët raportohet se aktivitetin e tyre kriminal nuk e ndaluan as gjatë bllokimit kur nuk lejohej lëvizja nëpër qytete. Pikërisht në një ndalim nga policia nisën dyshimet dhe më pas hetimet ndaj shqiptarëve.
Pas disa muajsh hetimesh shqiptarët u zbuluan se merreshin me shpërndarjen e drogës dhe brenda pak kohësh kishin bërë një shumë prej 100 mijë eurosh. Tashmë ata do të përballen me akuzat e trafikimit të kokainës.
