Kryeministri Edi Rama duket se është i vendosur pëër të rritur çmimin e energjisë elektrike, por nuk dihet se në ç´masë do të bëhet kjo.
Prej disa ditësh, Rama po përpiqet të bindë qytetarët se rritja e çmimit të energjisë po diktohet nga tregjet ndërkombëtare, duke theksuar se kriza energjitike është në të gjithë Botën dhe se është e pashmangshme për vendin tonë.
“Ne prodhojmë kur kemi reshje të mjaftueshme dhe mbushen hidrocentarlet dhe blejmë kur ka thatësirë sidomos kur është e zgjatur në kohë thatësira. Shqipëria është e varur njëlloj si të gjithë vendet e tjera nga çmimet e tregut ndërkombëtar.
Çmimet e bursës së energjisë në tregun ndërkombëtarë ku Shqipëria blen energji Shqipëria nuk bën ndonjë dallim me vendet e tjera në raport me rrogën, ne nuk kemi bërë krahasim të fuqisë blerëse por kemi informuar mbi influencën e çmimeve të energjisë elektrike në të gjithë tregjet ndërkombëtare në këtë krizë që ka prekur të gjithë vendet”, ka theksuar Rama.
Në përgjigjet e tij për komentuesit, Rama është shprehur se vendi ynë nuk e prodhon sasinë e energjisë që përdor ndaj është e detyruar që të ndjekë tregjet ndërkombëtare.
Sipas tij çmimi i energjisë për familjarët është nën koston reale dhe kjo është falë masave të marra për mbrojtjen e konsumatorit.
“Shqipëria nuk e prodhon sasinë e naftës që përdor, ajo që prodhon është e cilësisë së naftës së rëndë që shkon kryesisht në tregun ndërkombëtarë për tu përdorur në industrinë e bitumit. Rreth 600 mijë ton që përdoren në vendin tonë janë nënprodukte që vijnë nga importi.
Ne prodhojmë vetë vetëm një pjesë të energjisë që prodhojmë dhe kjo bën që të kemi një çmim të rregulluar dhe jo të liberalizuar. Edhe sot që flasim çmimi i energjisë për familjarët është nën koston reale, falë subvencionimin nga shteti dhe për familjarët dhe biznesin e vogël çmimi është nën koston reale”, u shpreh Rama.
