Ish-Kryeministri Sali Berisha në takimin e zhvilluar me anëtarët e PD-së në Gjirokastër tha se ka ndërmarrë një mision historik për demokracinë.
Ish-Kryeministri u prit nga disa qindra simpatizantë dhe anëtarë të PD me thirrjet “Berisha, Berisha”, dhe ovacione të shumta, ndërsa tha se përulej me nderim të thellv për kontributin që kanë dhënë në mbrojtje të lirive dhe vlerave që ndajmë sëbashku.
Berisha tha se qëndrimet e demokratëve dhe mbështetësve të PD kanë pasur një rëndësi të jashtëzakonshme në realizimin e të gjitha projekteve të mëdha të kësaj partie.
“Sot jemi thirrur në një mision të ri, në një mision të madh, në shpëtimin e pluralizmit politik, demokracisë dhe të PD”, tha Berisha.
Ai shtoi se PD solli votën e lirë, ndërsa sot pas 30 vitesh kemi qeverinë më të korruptuar, më anti-shqiptaren, qeverinë e rekordeve më të zeza që nga koha e Enver Hoxhës. Berisha tha se sot shqiptarët kanë pagat më të ulëtat në Rajon, kanë nivelin më të lartë të varfërisë dhe në 8 vite kemi shënuar rekordet më të zeza.
Berisha tha se Rama vrau shpresën e shqiptarëve, ndaj dhe sot qytetarët po marrin rrugët e Europës, duke shpopulluar vendin.
