Kancelarja gjermane Angela Merkel ka mbështetur sot tezën se BE nuk duhet të caktojë një datë për pranimin e vendeve të Ballkanit Perëndimor në Union, ndërsa ka vënë theksin në plotësimin e kushteve nga vendet që synojnë anëtarësimin.
Pas samitit që u zhvillua në Slloveni, Merkel deklaroi për mediat se për të caktuar një datë është e nevojshme të plotësohen të gjitha kushtet.
“Unë nuk besoj vërtet në caktimin e datave, besoj në përmbushjen e premtimeve tona: Pasi të plotësohen kushtet, pranimi mund të bëhet“, u tha Merkel, gazetarëve.
Kancelarja në detyrë u shpreh se një afat do ta vendoste BE-në nën presion, pavarësisht nëse Ballkani Perëndimor i plotësonte kushtet e përcaktuara nga blloku i 27 vendeve, apo jo.
Në samitin e sotëm të BE dhe Ballkanit Perëndimor u tha po ashtu se nuk ka një afat të përcaktuar për pranimin në BE dhe se liderët e Uninonit janë angazhuar në rajon në mënyrë që të mbahet një konferencë ndërqeveritare e BE-së me Shqipërinë dhe Maqedoninë e Veriut.
