Këngëtarja shqiptare me famë botërore, Ava Max, në një intervistë të dhënë për revistën Cosmopoltian, edicioni japonez, ka treguar se ëndërra amerikane s’ka qenë fort e lehtë për familjen e saj. Ajo ka folur për sakrificën e prindërve të saj kur u larguan nga Shqipëria për një jetë më të mirë në SHBA.
“Prindërit e mi nuk mund të flisnin anglisht dhe nuk kishin para. Ata bënin nga tre punë secili. Ende e pyes veten se si ata e bënin këtë… Ata sakrifikuan aq shumë gjëra për mua dhe vëllain tim, kështu që tani unë dua që t’i mbështes me çdo gjë”, ka thënë ajo.
E larguar nga Qeparoi, familja e Avës, emri i vërtetë i së cilës është Amanda Koçi, tashmë mund të gëzojnë një jetë të bukur falë talentit dhe suksesit të vajzës së tyre.
Ava ka rrëfyer se tashmë që mundet u ka blerë një shtëpi prindërve të saj në Los Angeles, që të jenë pranë qytetit ku e bija e tyre zhvillon karrierën e saj. Sakrifica që ka bërë familja e saj, i kanë dhënë vullnet që të mos dorëzohet asnjëherë në jetë, ka theksuar më tej këngëtarja.
