Kryeministri Edi Rama u shpreh sot në emisionin “Open” se “Open Balkan” i lë mbrapa atavizmat dhe gjithë këto situata që krijohen për shkak të politikave të brendshme.
Rama tha se pavarësisht situatës së krijuar në Veri të Kosovës dhe tensioneve të krijuara, ai do të ishte i gatshëm të shkonte në Beograd dhe nuk e kishte fare problem që ti bënte thirrje Albin Kurtit që Kosova t´i bashkohej nismës së “Ballkanit të Hapur”.
Duke i qëndruar idesë se “Ballkani i Hapur” është zgjidhja e duhur për Rajonin, Rama tha se nuk ka ndërmend të ndryshojë qasje ndaj kësaj nisme.
“Unë do shkoj që nesër në Beograd nëse më ftojnë në një takim. Do marr avionin do iki. Që Serbia duhet të kërkojë falje kjo nuk diskutohet. Por si do e kërkojë faljen? Falja kërkohet në një proces, do të vijë me arritjen e marrëveshjes dhe jo me prezumimin e saj.
Jaser Arafati ishte i damkosur si terrorist ndërkombëtar, por nuk kërkoi asnjëherë falje. Isak Rabin u ul në tavolinë me Arafatin, dhe nuk i tha kërko njëherë falje pastaj të ulemi në tavolinë.
“Ballkani i Hapur” nuk është asgjë tjetër vetëm procesi i Berlinit, ku liderët e ballkanit po marrin përsipër përgjegjësitë”, tha Rama.
