Vllaznia e ka mbyllur në avantazh pjesën e parë ndaj Partizanit. Në fraksionin e parë të lojës diferencën e ka bërë goli i Da Silvës në minutën e 4-t.
Latifi shmanget mirë në krahun e majtë dhe në mënyrë të papritur çon topin në qendër ku braziliani nuk gabon duke tundur rrjetën.
Skuadra e Ilir Dajës ka zhvilluar një pjesë të parë të vakët teksa kundërshtari e ka lexuar lojën e të kuqve. Rasti më i mirë për “Demat” do të vinte në minutën e 32-të. Portieri i shkodranëve, Zogovic , do t’i mohonte golin e barazimit Ergys Kaçes pas një goditje dënimi thuajse perfekte të mesfushorit.
Në minutën e 37-të, Vllaznia kishte mundësinë të dyfishonte shifrat por Hoxha me një ndërhyrje “alla Neuer” mban në lojë të kuqtë.
Pasim i gabuar mbrapa i Malës, Da Silva niset drejt portës por Hoxha tregohet vendimtar me një dalje duke i hequr topin nga këmbët brazilianit.
