Skënder Brataj, kreu i Urgjencës Kombëtare, ka pohuar mbrëmjen e sotme se nuk ka bazë ligjore për aplikimin e vaksinave me detyrim.
Brataj, anëtar i Komitetit Teknik anti-Covid, u shfaq konfuz në dy momente: një lidhur me vaksinat me detyrim, dhe së dyti duke rrëzuar teoritë shkencore, lidhur me imunitetin natyral, që sipas ekspertëve është shumë më i fortë se ai që krijohet nga vaksinat.
Në studion e ABC, Brataj pohoi se vaksina është arma e vetme që na mbron për momentin nga Covid-19, por theksoi se nuk ka asnjë bazë ligjore specifike që ta bëjë me detyrim.
Gjithsesi brenda pak minutash, Brataj përmendi ligjin për sëmundjen infektive, që sipas tij mund të shërbejë për aplikimin e vaksinave të detyrueshme.
“Me detyrim apo jo është gjë tjetër. Ne kemi 10 vaksina në Shqipëri që bëhen me detyrim, por ka edhe fakultative. Nëse duhet ta bësh me detyrim apo jo duhet të ndryshosh bazën ligjore. Vaksina është e dobishme, duhet bërë, e ka bërë e gjithë familja ime, edhe pse e ka kaluar sëmundjen.
Me detyrim apo jo? Nuk e vendos specialisti, ne këshillojmë. Baza ligjore? Këtu nuk është se nuk ka fare bazë ligjore. Ti hyn te ligji i sëmundjeve infektive, dhe unë si shtet do të ndërhyj. Bazë ligjore nuk ka për këtë, por nëse ti je rrezik për të tjerët unë si shtet do të ndërhyj”, tha ai.
