Erion Veliaj, kryebashkiaku i Tiranës, duket se ka shpërfillur një porosi të Kryeministrit Edi Rama, njëherazi edhe Kryetar i PS-së, për të mos u përfshirë në përplasjet që po ndodhin në Partinë Demokratike, pas përjashtimit të Sali Berishës nga Grupi Parlamentar i PD me vendim të kreut demokrat Lulzim Basha.
Ditën që Kryeministri postonte nga SHBA pamje nga vizita, Veliaj u shfaq në media duke qenë i pari në rradhët e Rilindasve të Ramës, shfaqej në mbështetje publike ndaj Lulzim Bashës.
“Unë kam thënë më parë, që Berisha do e mbyllë me turp. Po jetove duke shpifur dhe sajuar duke iu hapur gropën njerëzve, atëherë do biesh vetë brenda. Në politikë, biologjia bën të vetën. Nuk besoj se dhe ata ithtarë të Saliut që thonë se ai është e ardhmja. Ai vetëm e ardhmja nuk është. Ai nuk ka as kohë të rehabilitohet. Kur vjen puna te kundërshtarët, them kokën hëngshin. Vetë e gatuan këtë kulturë, të shpifjes dhe lajmit të rremë. Janë po ata që filluan tek lodrat dhe më pas vazhduan te Astiri. Ata morën 3 vite të jetës sonë në Astir.
Kush jeton nga shpata do vdesë nga shpata. Me fundin e Saliut është fillimi i fundit të kësaj politike. Mësimi për të tjerët është që jeto një jetë dinjitoze. Unë besoj që kultura toksike dhe vandale, Tirana digjej për sport nga protestat. Kthehej në një fushë beteje. Shpresoj që Shqipëria do jetë më e mirë me largimin e Berishës dhe Berishizmit. Me grisjen e letrave në Kuvend nga Basha, mendova që nuk ka ikur ende berishizmi”, tha Veliaj.
I pyetur lidhur me bashkëpunimin me opozitën, Veliaj përsëriti qëndrimin e kryeministrit Edi Rama, se do t’i shtrijë dorën opozitës për bashkëpunim në çështje me interes kombëtar.
“Edi Rama e ka thënë troç, kur vjen radha për Presidentin e ardhshëm, unë do i shtrijë dorën opozitës. Kjo do të jetë për reformën në drejtësi, apo reformën administrative”, tha Veliaj.
Në fakt Kryebashkiaku i Tiranës mund të jetë ndër të paktit që nuk mund të bëjë moral lidhur me “fake news”. Jo vetëm gjatë kohës si pushtetar, ministër dhe më pas Kryebashkiak, që përdor propagandën dhe show në çdo rast, por edhe në kohën kur ishte thjesht një opozitar do të kujtohet për “fake news” horror që përhapi në çdo kancelari europiane lidhur me rastin e bashkëjetueses së një prej kandidatëve të PS për kryebashkiak, për të cilën dha alarmin se ishte rrëmbyer, se kishin kryer një krim makabër duke i dështuar fëmijën dhe për të gjitha këto akuzonte Qeverinë.
