Kryeministri Edi Rama deklaroi këtë të Enjte nga foltorja e Kuvendit se Shqipëria synon të jetë kampione në turizëm, në Ballkan. Gjatë fjalës së shpalljes së programit qeverisës, tha se do vihet theksi te pastërtia dhe lufta ndaj ndërtimeve pa leje. Po ashtu, paralajmëroi heqjen nga tregu të qeseve plastike më 1 Qershor, pasi sipas tij, janë një ndotës i ambientit.
“Bashkitë që s’pastrojmë e menaxhojmë plehrat s’do marrin fonde”, theksoi Rama.
“Pastërtia duhet të kthehet në kryefjalën e çdo qeveria vendore dhe kryebashkiaku. S’do tolerojmë më mbylljen e syve të pushtetit vendor, të ndërtimeve pa leje, që do jetë një nga shënjestrat e policisë së Shtetit, sipas ligjit që kemi parë e riforcuar në këtë aspekt. Duhet të garantojmë pastërtinë dhe paprekshmërinë e turizmit. Ne duam ta bëjmë Shqipërinë kampione në rajon për turizmin”, u shpreh.
“Qeset plastike janë kthyer në makth. Prodhimi, shitja dhe futja e qeseve për përdorim individual do sanksionohet me o tolerancë. Do anulohen lejet dhe licensat për të grumbulluar mbetjet nga kazani më kazan duke nxjerrë mbetej nga kazanët dhe duke ndotur ambientin. Një qershori do jetë dita e çlirimit të Shqipërisë nga qeset plastike”, tha Rama.
Po ashtu, deklaroi se së shpejti do nisë puna për portet turistike në Sarandë, Durrës, Shëngjin e Vlorë, dhe për aeroportet e Vlorës e Sarandës.
