Dy ndeshjet e para të Champions League dhuruan menjëherë surpriza për tifozët. Sytë të gjithë i kishin në Zvicër, ku Cristiano Ronaldo debutoi me Man. United edhe në kompeticionin më të rëndësishëm dhe e la menjëherë shenjën e tij por anglezët e pësuan në fund.
Në duelin ndaj Young Boys në Grupin F, “Djajtë e Kuq” u shokuan me një humbje 2-1 ku goli i Ronaldos në 13’ nuk mjaftoi dhe dalja me të kuq e Bisakka në 35’ prishi shumë punë për ekipin e Solskjaer.
Zviceranët reaguan duke përfituar dhe në 66’ arritën të barazonin me Ngamaleu ndërsa në sekondat e fundit, Siebatcheu bëri mrekullinë për të përmbysur ndeshjen. Një humbje që djeg shumë për Man. United të cilët kanë ambicie të mëdha këtë sezon me Ronaldon në skuadër.
Barazim 1-1 përfundoi ndeshja tjetër e Grupit G mes Sevillas dhe Salzburg ku gjithçka ndodhi në pjesën e parë dhe u dhanë jo pak por 4 penallti.
Fillimisht Adeyemi në 13’ gaboi një penallti për miqtë teksa Susiç në një tjetër 11-metërsh në 21’ nuk gaboi për t’i dhënë avantazhin austriakëve.
Në 36’ sërish Salzburgu mori një tjetër penallti dhe kësaj radhe edhe Susiç e humbi ndërsa në 41’ nga një penallti e fituar nga vendasit, ishte Rakitiç që shënoi dhe barazoi në 1-1.
