“A do e prisni dhe do pini kafe e Sali Berishën”, ishte pyetja që iu drejtua Lulzim Bashës, kryetar i PD, nga disa prej kryetarëve të degëve të kësaj partie, në takimin e thirrur nga kryedemokrati për t´i informuar, pa iu dhënë detaje, lidhur me vendimin për përjashtimin e ish-Kryeministrit nga Grupi Parlamentar i PD.
“Po, dera ime dhe e PD mbetet e hapur. Berisha është anëtar i përhershëm i Këshillit Kombëtar dhe Kuvendit Kombëtar”, ishte përgjigjia e dhënë nga Basha, i cilika ripohuar para drejtuesve të degëve se vendimi për përjashtimin e Berishës nga Grupi Parlamentar ishte më i vështiri që ka marrë dhe përgjegjësia është vetëm e tij.
Nga raportimet mësohet se Basha nuk i ka dhënë shumë detaje drejtuesve të degëve, të cilëve u ka kërkuar që të mos jenë pjesë aktive e debateve, sikundër nuk ka pranuar që të nisë një tur takimesh në degë, për të sqaruar anëtarët e strukturave dhe bazën e partisë.
“Sill njerëz të sqarojnë bazën, nëse nuk do të vini vetë”, iu drejtua një prej kryetarëve të degësve të PD, kreut demokrat, i cili sërisht ka refuzuar dërgimin e ndonjë ekipi duke marrë mbi supe përgjegjësinë e vendimit.
“Atëherë ne do e takojmë z.Berisha nëse na vjen në takime, sikundër ka deklaruar dhe gjithashtu anëtarët e partisë do e presin”, ishte një tjetër reagim në mbledhjen e Bashës me drejtues të degëve.
Nga burimet mësohet se kreu demokrat i ka qëndruar idesë se koha është ilaçi më i mirë për të sheshuar debatet, ndërsa ka pohuar se vendimi ka ardhur pasi nuk kishte asnjë opsion tjetër dhe ishte e pamundur të negociohej.
