Sot është dita e Kristiano Ronaldos, i cili do të debutojë me fanellën e Mançester Junajtidit pas 12 vitesh, në “Old Trafford” kundër Njukasëllit. Zhgënjimi në kompeticionet europiane me Juventusin e ka motivuar si kurrë më parë për të triumfuar.
Në vigjilje të ndeshjes, gjatë një interviste për ish-shokun e skuadrës Uest Braun, në vizitën e parë në “Teatrin e Ëndrrave” pas rikthimit, portugezi ishte i qartë: “Nuk jam në Mançester për pushime. Është bukur të veshësh sërish një fanellë me të cilën jam i lidhur dhe e lashë 12 vite më parë. Por kam ardhur këtu për të fituar sërish. Jemi në gjendje për të konkurruar për objektiva të rëndësishme. Jam gati për ta mbështetur këtë sfidë të re dhe mendoj se mund ta bëj në 3-4 vitet e ardhshme”. Stadiumi do të jetë plot, me mbi 74 mijë spektatorë, ndërsa tifozët kanë përgatitur kore speciale: “E di, më ka informuar Bruno Fernandesh dhe jam me të vërtetë i kënaqur për këtë pritje. Një motiv më shumë për të dhënë maksimumin për këta njerëz”.
Po në fushë? Trajneri Solskjaer e konfirmoi se sot 36-vjeçari do të zbresë në fushë, por ku? Në të djathtë, në të majtë apo qendër të sulmit? Trajneri norvegjez është duke i vlerësuar të gjitha alternativat. Ka lojtarë të rëndësishëm si Marsial dhe Kavani të cilët rrezikojnë që të sakrifikohen përpara prezencës së CR7-ës.
Por tani nuk mendohet asgjë nga këto. I gjithë populli i “Old Trafford” mezi po pret të përshëndesë kampionin e rikthyer në shtëpi.
“Ai ka bërë një fazë të mirë përgatitore me Juventusin dhe ka luajtur me kombëtaren. Ka bërë një javë të mirë stërvitore këtu me ne dhe pa dyshim që do të jetë në fushë në një moment të ndeshjes. Sigurisht që ne e dimë se çfarë ka fituar në karrierë, por ai vjen këtu për të fituar më shumë. Kjo është ajo që ai bën. Ai ka jetuar gjatë gjithë jetës me disiplinën e një profesionisti klasi. Që kur erdhi këtu, e kujtoj se ishte i pari që përgatitej për ndeshjet”, deklaroi Solskjaer në konferencë.
