Skënderbeu dhe Partizani ruajnë ritmin në krye të klasifikimit, teksa falë fitoreve respektive 4-1 ndaj Flamurtarit dhe 2-0 ndaj Teutës, distancohen edhe më shumë nga ndjekësit, ndërkohë që ruajnë të paprekur ditancën mes tyre, prej katër pikësh, me kampionët në fuqi që mbeten lider të klasifikimit.
Gati e pandryshuar ka mbetur gara për vendin e tretë të klasifikimit që përkthehet me një biletë për në Kupat e Europës, e diskutuar mes Kukësit, Teutës dhe Tiranës. Kjo e fundit mbetet më pak favoritja mes të trejave, teksa mban vendin e pestë, pasi sot nuk ka mundur dot të marrë më shumë se një barazim 1-1 ndaj rivalit direkt, Kukësit.
Skënderbeu-Flamurtari 4-1.
Skënderbeu-Flamurtari 4-1 Skënderbeu vijon me hap kryesues teksa ka mposhtur sot në shtëpi skuadrën e Flamurtarit me rezultatin 4-1. Një fitore e vendosur për korçarët në pjesën e dytë të takimit falë dygolëshit të bomberit Hamdi Salihi dhe realizimit të Xhejms, teksa pjesa e parë u mbyll në barazim 1-1, pas eurogolit të Radas që zhbllokoi i pari rezultatin dhe barazimit të rivendosur nga Lushtaku, që nuk gabon nga pika e bardhë e penalltisë. Nga ana tjetër, skuadra e Flamurtarit vijon rekordin e saj negative, teksa në pesë ndeshjet e fundit regjistron tre barazime dhe dy humbje, për të mbetur plotësisht në garë për mbijetesë, vetëm dy pikë më shumë se Bylis në vend të parafundit.
Shënues: Radas 15′, Salihi 55′, 60’ (11-m), Xhejms 74’/ Lushtaku 40′ (11-m)
Skënderbeu: Shehi, Radas, Jashanica, Arapi, Abazi, Progni, Lilaj, Orelesi, Latifi, Xhejms, Salihi. Trajner: Mirel Josa
Flamurtari: Lika, Idrizaj, Krasniqi, Lakoste, Çerkini, Curri Nikolini, Lushtaku, Da Silva, Hoxha, Alvesh. Trajner: Zekerija Ramadani
Teuta-Partizani 0-2.
Teuta – Partizani 0-2 Partizani nuk gabon në Durrës, duke mundur, ndonëse me rezultatin 2-0, skuadrën e Teutës. Një fitore e vendosur nga goli i Bathës, i realizuar në minutën e 53’, kur pas një goditje standarde, mesfushori i të kuqve ka goditur topin me kokë, për ta dërguar atë në rrjetën e durrsakëve, e siguruar më pas, në minutën e 86’ nga goli i Dajës. Tre pikë mjaft të rëndësishme për Partizanin që vijon misionin e tij në ndjekje të Skënderbeut. Nga ana tjetër, kjo disfatë e skuadrës së Teutës nuk është shoqëruar me ndryshime në klasifikim, teksa mbetet në vend të katërt, mes Kukësit dhe Tiranës, në garë për vendin e tretë.
Shënues: Batha 53′, Daja 86’
Teuta: Moçka, Lukiç, Shkalla, Hoxha, Kotobelli, Musta, Hila, Lena, Dita, Çyrbja, Magani. Trajner: Gugash Magani
Partizani: Hoxha, Fejzullahu, Bicaj, Krasniqi, Atanda, Vila, Filipe, Batha, Trashi, Torasa, Sukaj. Trajner: Andrea Agostinelli
Tirana-Kukësi 1-1. Tirana – Kukësi 1-1 Drejtuesit e Tiranës, me në krye kryeaksionerin Refik Halili, do të duhet të bëjnë sot llogaritë jo vetëm sportive, teksa bardheblutë nuk mundën të marrin më shumë se një barazim 1-1 përballë Kukësit, rival direkt në luftën për një vend në Kupat e Europës, ndërkohë që u ndeshën sërish me bojkotin e tifozëve. Kështu, rezultoi e kotë përpjekja e krerëve të klubit 24 herë kampion për të joshur rikthimin e tifozëve nëpërmjet ndezjes së proxhektorëve në “Selman Stërmasi”, teksa të pranishmit në shkallët e impiantit të ndriçuar numëroheshin me gishtat e dorës. Bardheblutë kaluan të parët në avantazh me Muzakën që realizoi në minutën e 18’, por pa mundur dot të ruajnë epërsinë, teksa Flores ka barazuar shifrat në minutën e 53’.
Një barazim që ka mbetur i paprekur deri në vërshëllimën e fundit të gjyqtarit, për të ruajtur ekuilibrat edhe në klasifikim.
Shënues: Muzaka 18’/ Flores 53’
Tirana: Ed. Bakaj, Kërçiku, Teqja, Deliaj, Hoxhallari, Karabeci, Malaj, Peçi, Muzaka, Fukui, El. Bakaj. Trajner: Ilir Daja
Kukësi: Koliçi, Lladrovci, Malota, Shameti, Mici, Nika, Hasani, Musolli, Flores, Karioka, Emini. Trajner: Klodian Duro
