Deputeti i Partisë Demokratike në Durrës, Oerd Bylykbashi ka përshendetur sot të gjithë anëtarësinë e PD-së së këtij qyteti në 26- vjetorin e krijimit të PD-së dega Durrës.
Përmes një postimi në faqen e tij zyrtare në rrjetin social “Facebook”, i deleguari i kryedemokratit Lulzim Basha për riorganizimin e kësaj dege në kuadër të përgatitjeve për zgjedhjet parlamentare të 18 qershorit, përcjell një mesazh urimi edhe për ata demokratë që sot nuk janë pjesë e udhëtimit të PD-së.
Teksa shpreh falënderimet përkatëse, Bylykbashi shprehet se përvoja e së kaluarës duhet të jenë mundësi për të mësuar dhe për t’u ringritur. “T’i rikthehemi Durrësit dhe durrsakëve me moral dhe dinjitet përballë arrogancës që i qeveris me përbuzje. Ta rikthejmë së bashku PD Durrës në forcën fituese më 18 qershor”, thotë ai.
DEKLARATA E PLOTË
Të dashur aëtarë të PD dega Durrës,
Gëzuar 26-vjetorin e themelimit të Degës! Janë 26 vite të një rrugëtimi të gjatë, të vështire, plot suksese e fitore, plotësim premtimesh por edhe vështirësi, humbje apo përgjegjësi për çfarë nuk kemi arritur dot, të cilat duhet të jenë mundësi për të mësuar e për t’u ringritur dhe bërë më mirë e më drejtë në të ardhmen.
Një mirënjohje e veçantë të gjithë themeluesve të PD, edhe atyre që sot nuk janë në të njëjtin shteg udhëtimi me ne, por që gjurmën e tyre në themel të kësaj Dege e kanë të pashlyer. Mirënjohje e veçantë, sepse themeluan një ideal në kohë sakrificash ekstreme. Mirënjohje për të gjithë anëtarët dhe drejtuesit që mbajtën barrën në ditët e vështira të 1997-ës, kur pushteti i votës ra nën pushtetin e armës.
PD është shtëpi e madhe ku gjithsecili ka vendin e tij. Detyra jonë është të veme në qendër të saj idealin që na bashkoi 26 vjet të shkuara. T’i rikthehemi Durrësit dhe durrsakëve me moral dhe dinjitet përballë arrogancës që i qeveris me përbuzje. Ta rikthejmë së bashku PD Durrës në forcën fituese më 18 qershor.
Demokratë të vjetër e të rinj, ju që keni teserën e 1991 apo të 2016, ju që mishëroni eksperiencën, qëndresën dhe energjinë e gjakut të ri, gëzuar përvjetorin!”.
