Komisioni Qendror i Zgjedhjeve shtyu për në 29 dhjetor mbledhjen e sotme duke mos marrë asnjë një vendim për kërkesën e Prokurorisë që kërkon heqjen e mandatit për deputetët e Kuvendit, Shkëlqim Selami dhe Dashamir Tahiri, si për kryetarin e bashkisë Kavajë, Elvis Roshi.
Me propozim të përfaqësuesve të maxhorancës, séanca e sotme u shty për më 29 dhjetor, pa marrë një vendim, ndërsa u ra dakord që Komisioni t’i drejtohet organit të akuzës me kërkesën per informacione shtesë lidhur me rastet e tre zyrtarëve.
Në fund të mbledhjes, ku u degjuan dhe avokatët e tre zyrtarëve, që ju kërkohet lënia e mandatit, kryetari i Komisionit, Denar Biba, e vlerësoi seancën, ku sic tha ai, u vumë në dijeni të disa fakteve që nuk rezultojnë nga materiali i Prokurorise. “Ne do te vimë drejt vendimmarrjes dhe do vendosim per të tre rastet dhe jam i bindur që secili nga kolegët e mi, nuk do i referohet vetëm materialeve të prokurorisë, por duhet të jemi shumë të kujdesshëm se vendimi ynë duhet të kete referenca sa ligjore, aq dhe dokumentative.
“Personat që kanë kryer ato vepra do t’i vuajnë pasojat e atyre, por në këte vendimmarrje ne duhet te jemi korrektë. Ndaj propozoj qe minimalisht të na jepen disa të dhena mbi vendimet perkatëse për këta njerëz qe mund te penalizohen”, tha kryetari i KQZ-se, Biba, i cili verejti mungesen e përfaqesuesve të Prokurorise, ne nje ceshtje me interes shumë të lartë politik dhe publik. nenvizoi Biba.
Nënkryetari demokrat i KQZ-se, Hysen Osmanaj u shpreh kunder marrjes së informacionit shtese nga prokuroria. “Nuk kemi cfarë i kërkojmë Prokurorise, se ajo e ka dhëne vendimin e saj. Ne kemi detyre vetem ta zbatojmë. Nuk kemi nevojë ti kerkojmë organit te akuzes asnjë kërkesë tjetër, ne mund t”i regjistrojmë keto prova që sollen dhe të caktojmë vetëm kohën”, tha Osmanaj.
Mandatet e Selamit, Tahirit dhe Roshit-PS:Vendimarrja e KQZ-së të jetë serioze, pa i ndarë rastet
Komisioni Qendror i Zgjedhjeve po shqyrton të martën rezultatin e verifikimit të Prokurorisë së Përgjithshme që kërkon heqjen e mandatit për dy deputetë të Kuvendit, Shkëlqim Selami dhe Dashamir Tahiri, si për kryetarin e bashkisë Kavajë, Elvis Roshi, një javë pasi ata u shpallën nga organi i akuzës si persona që iu ndalohet e drejta të ushtrojnë funksione publike, në zbatim të ligjit të dekriminalizimit.
Në hapje të mbledhjes, kryetari i KQZ-së, Denar Biba tha se roli i këtij institucioni sot është në respekt të kodit të procedurës administrative. “KQZ ka një rol më pasiv. Ne sot jemi kryesisht për të dëgjuar, diskrecioni ynë është minimal dhe kompetenca është kryesisht e prokurorisë”, u shpreh ai.
Në ndërhyrjen e tij, përfaqësuesi ligjor i Partisë Demokratike, Gazmend Bardhi, u shfaq në mbrojtje të deputetit demokrat Dashamir Tahiri, ndërsa mbështeti heqjen e mandatit për dy zyrtarët e tjerë, deputetin e LSI-se, Shkëlqim Selami dhe kryebashkiakun socialist, Elvis Roshi. Ndërsa për rastin e Dashamir Tahirit ai tha se kërkesa e Prokurorisë nuk qëndron.
“Elvis Roshi ndodhet në kushtet e mbarimit të mandatit që nga maji i 2016-s kur ai depozitoi formularin e vetëdeklarimit. Ne besojmë se Roshi ka qëndruar në detyre per 8 muaj në mënyrë te kundraligjshme dhe vlerësimi ynë sot është që KQZ-ja duhet të vendosë largimin e tij nga detyra, si subjekt i ligjit te dekriminalizimit. Edhe ndaj deputetit Selami ne çmojmë se ndaj tij vepron pika 1, e nenit 16- të ligjit, që i ndalon që për 10 vjet të kandidojë, të zgjidhet apo të ushtrojë funksionet e parashikuara nga ligji në fjalë”, tha Bardhi.
Ndërsa sa i takon rastit të deputetit demokrat, Dashamir Tahiri, Bardhi tha se ndaj tij nuk ka asnjë pengesë per të ushtruar funksione publike. Ndaj Tahirit në Itali është bërë ekzekutimi i menjëhershëm i dënimit. Dhe vepra e tij penale është amnistuar në vitin 2006 nga shteti italian. Sipas ligjit të dekriminalizimit ai e ka shlyer dënimin deri në vitin 2014. Ndaj per te nuk ka asnjë pengesë për të ushtruar funksione publike”, tha Bardhi.
Përfaqësuesi ligjor i Partisë Partisë Socialiste, Genc Gjonçaj, kërkoi që rastet që po shqyrton sot KQZ të mos ndahen nga njëri-tjetri.
“Ne qëndrojmë në mbështetje të vendimarrjes suaj pa i ndarë rastet dhe pa i gjykuar ato. Kjo nuk është vetëm një çështje e ligjit të dekriminalizimit, por më shumë është një çështje kushtetuese. Janë jo pak, por katër ndërhyrje në Kushtetutë që të imponojnë vullnetin që kushdo që ka pasur probleme me ligjin duhet të lërë mandatin ose të largohet nga jeta publike”, iu drejtua Gjonçaj anëtarëve të KQZ-së.
Ai tha se kjo është vendimarrja e parë e KQZ-së e kësaj natyre, dhe ajo duhet të jetë serioze, pasi do të vendosë rregullat për të ardhmen. Ndaj më shumë se në terrenin e argumenteve ‘pro’ ose ‘kundër’ ne duhet të shikojmë vendosjen e një rregulli, pasi pozita e KQZ-së është relativisht e paqartë.
Gjonçaj tha se me kërkesën e ardhur nga prokuroria, KQZ ka pak mundësi për diskutim, vetëm të verifikojë nëse materiali është serioz dhe i plotë.
Dekriminalizimi, sipas tij, nuk është vetëm çështje ligji, por më tepër është çështje morale. Largimi nga jeta publike e funksionarëve që kanë pasur probleme me ligjin është më shumë një detyrë e shoqërisë se e forcon atë, ndaj na duhet të mbështesim vendimarrjen e KQZ-së dhe në këtë drejtim qëndrimi ynë duhet të jetë parimor.