Aleanca për Mbrojtjen e Teatrit ka depozituar sot në SPAK një ankimim dhe një kallëzim të ri.
Ankesa ka të bëjë me vendimin e prokurores së SPAK, Manjola Kajana, e cila nuk pranoi nisjen e hetimit për ambasadorin e BE Luigi Soreca sa i përket takimit me kryetaren e Gjykatës Kushtetuese Vitore Tusha.
Ndërsa kallëzimit të sotëm, përveç kryebashkiakut të Tiranës Erion Veliaj dhe ambasadorit Soreca, i është bashkangjitur edhe emri i prokurores Kajana për “shpërdorim detyre”.
Veliaj e Soreca kallëzohen për “Korrupsion aktiv i nëpunësve të huaj publik”, “Shpërdorim detyre” dhe “Ushtrimi i ndikimit të paligjshëm ndaj personave që ushtrojnë funksione publike”.
Adriana Kalaja, avokatja e kauzës së Teatrit, tha se kanë ngulmuar në hetimin nga SPAK të një vepre penale, ndikim të paligjshëm të ushtruar mbi sistemin gjyqësor nga Ambasadori i BE, Luigi Soreca dhe nga kryebashkiaku i Tiranës, Erion Veliaj.
Kalaja u shpreh se i kanë kërkuar prokurores t’i japë përgjigje edhe pyetjes se në çfarë dispozite ligjore parashikohet që një ambasador qoftë i BE-së apo i SHBA-së duhet të shkojë në një gjykatë të caktuar aq më shumë në Gjykatë Kushtetuese?!
“Ne shikojmë sesi këta nuk kanë besim tek drejtësia e re që kanë ngritur dhe fillojnë të ushtrojnë ndikimin e tyre të paligjshëm”, theksoi Kalaja.
“Sot ne u paraqitëm edhe pranë SPAK-ut dhe Gjykatës së Posaçme të Shkallës së Parë për Korrupsionin dhe Krimin e Organizuar pasi depozituam dy dokumente të përpiluara nga ne.
E para ka të bëjë me ankimin që kemi bërë ndaj vendimit të prokurorit të SPAK-ut për mosfillimin e hetimeve ndaj kallëzimit të bërë nga ne para disa kohësh që lidhej me Ambasadorin Soreca dhe Kryetarin e Bashkisë Tiranë, Erion Veliaj që kanë shpërdoruar detyrën dhe kanë ushtruar ndikim të paligjshëm në sistemin gjyqësor.
Ne e kemi argumentuar dhe provuar veprën penale të konsumuar nga Ambasadori Soreca që këtë vepër penale e ka kryer në bashkëpunim dhe nën ndikimin e paligjshëm dhe të Kryetarit të Bashkisë, Veliaj, por prokurorja Manjola Kajana nuk e ka parë të arsyeshme për fillimin e hetimeve dhe ka vendosur mosfillimin e hetimeve.
Në ankimimin tonë para Gjykatës së Posaçme ne kemi evidentuar pse duhet të regjistrohet ky kallëzim penal dhe pse zoti Soreca dhe Erion Veliaj duhet të përgjigen para ligjit se është tashmë e vërtetuar që të dy këta në bashkëpunim me njeri tjetrin kanë ushtruar ndikim të paligjshëm në organet e sistemit të drejtësisë.
Në të gjithë 5-fletëshin që ka bërë prokurore Kajana nuk e ka argumentuar pse ka filluar mosfillimin e hetimit dhe as përgjigjur pyetjes që ne kemi shtruar se në çfarë dispozite ligjore parashikohet që një ambasador qoftë i BE-së apo i SHBA-së duhet të shkojë në një gjykatë të caktuar aq më shumë në Gjykatë Kushtetuese.
Po kështu, ne këtë vendim që e kemi ankimuar, i kemi kërkuar Gjykatës së Posaçme që ta prishë vendimin e mosfillimit dhe të detyrojë SPAK-un për hetimin e plotë të kësaj ngjarjeje vepër penale që për ne është atentat i rëndë ndaj Reformës në Drejtësi se janë reformat ë strukturës në drejtësi të mbështetur nga këta ndërkombëtarë dhe ne shikojmë sesi këta nuk kanë besim tek drejtësia e re që kanë ngritur dhe fillojnë të ushtrojnë ndikimin e tyre të paligjshëm.”
