Ish-kryeministri, Sali Berisha, ka sjellë gjatë konferencës për shtyp edhe një rast të ngjashëm me rastin e tij.
Berisha tregoi historinë e një kryetari parlamenti, i cili ishte shpallur ‘non grata’ nga administrata e ish-presidentit amerikan, Barack Obama nën ndikimin e miliarderit kontrovers, George Soros.
Por ai vazhdoi të drejtojë parlamentin dhe vendimi i pabazuar, u rrëzua nga administrata e presidentit Donald Trump.
“Për rekordet kriminale, secili që akuzon pa fakte bazë, ka probleme madhore me karakterin. Kam qenë në një vend mik para pak vitesh dhe më priti kryetari i parlamentit. Kryetari i parlamentit ishte black-listuar si Sali Berisha. Jo vetëm ai, por edhe nja 9 apo 11 të tjerë. Të gjithë në përballje me George Soros. Ata vazhduan me sukses punën e tyre në parlament, i fituan dhe zgjedhjet më vonë. Administrata tjetër amerikane i hoqi ato vendime të marra mbi bazën e shpifjeve dhe trillimeve. Por e thashë edhe një herë. Ai drejtonte parlamentin, sigurisht i keqardhur. Nuk ka njeri që nuk ka keqardhje kur sheh të vijë një vendim nga një vend që admiron, pa asnjë bazë, pa asnjë fakt, asnjë dokument”, rrëfeu Berisha përpara gazetarëve.
