NGA ILIR SINANAJ
Në Shqipëri raporti i vdekshmërisë së grave si pasojë e ndërlikimeve shëndetësore, gjatë ose pas shtatzënisë është 29 në 100 mijë gra.
Kjo është statistika zyrtare e raportit World Health Statistics (Statistikat Botërore të Shëndetësisë) për vitin 2016 të “Organizatës Botërore të Shëndetësisë (OBSH)”.
Shqipëria ka gjithashtu nivelin më të lartë në rajon për sa i përket raportit të vdekshmërisë së grave gjatë ose pas shtatzënisë si pasojë e ndërlikimeve shëndetësore. Renditja e Shqipërisë në rajon gjithashtu është nga më të këqijat, duke u renditur e 44-ta nga 49 vende të Evropës.
Raporti i vdekshmërisë së grave gjatë ose pas shtatzënisë, sipas OBSH-së përkufizohet si: vdekja e një gruaja ndërsa është shtatzënë ose brenda 42 ditëve nga mbarimi i shtatzënisë, pavarësisht zgjatjes apo vendit të shtatzënisë, nga çdo shkak që lidhet me ose përkeqësohet nga shtatzënia ose mënyra e jetesës gjatë shtatzënisë por jo nga aksidente apo shkaqe rastësore.
Nisur nga ky përkufizim i OBSH-së, arrihet në përfundimin se raporti i lartë në Shqipëri i vdekshmërisë së grave gjatë ose pas shtatzënisë vjen si një nivel i keq i jetesës (këtu përfshihet ushqyerja) si edhe mungesa e shërbimeve shëndetësore të mirëmenduara për të ndjekur e monitoruar shtatzëninë e një gruaje.
