Gjykata e Tiranës ka vendosur shtrim të detyruar në spitalin psikiatrik për Ajdin Morinën, fansin që përndiqte moderatoren Luana Vjollca. Gjykata pranoi kërkesën e prokurorisë së Tiranës për pushimin e çështjes dhe shtrimin e detyruar në spital psikiatrik.
Gjatë hetimit u kërkua kryerja e ekspertizës psikiatrike ligjore në bazë të së cilës ai rezultoi me çregullime psikotike të një natyre të paspecifikuar. Sipas aktit të ekspertimit, Ajdin Morina, nuk i kupton natyrën e veprimeve që kryen.
Ajdin Morina, 29-vjeçari nga Kosova, u denoncua në Prokurorinë e Tiranës nga Luana Vjollca sepse e përndiqte prej disa muajsh moderatoren. Moderatorja njoftoi policinë dhe më pas u bë i mundur arrestimii i tij.
“Ti do të jesh e imja. Do jesh me mua me zor”– ky është një ndër qindra mesazhet që fansi 29-vjeçar i ka dërguar me e-mail moderatores Luana Vjollca. Prej afro një viti, që kur aplikoi për të marrë pjesë në audicionet e një emisioni që do të drejtohej nga Luana, por u anulua për shkak të pandemisë, Ajdin Morina ka përndjekur vazhdimisht drejtuesen e “Shiko kush LUAN”.
Në dy kallëzime që ka bërë në Polici për përndjekje moderatorja është shprehur se ky person po e terrorizon dhe ajo ka frikë për vete dhe për familjarët. Madje, për shkak të kësaj situate ajo është shprehur se i ka cenuar privatësinë dhe nuk po e lejon që të jetojë jetën në mënyrë normale. Kjo ka qenë edhe arsyeja që ajo është detyruar të marrë një truprojë që ta shoqërojë kudo.
Kujtojmë se në muajin maj të vitit të kaluar moderatorja bëri denoncimin e parë ndaj tij.
Kujtojmë gjithashtu se kjo është hera e dytë që moderatorja përballet me fansat në organet e drejtësisë. Më herët, policia ka arrestuar një tjetër person për përndjekje të saj. Në prill të vitit 2017, Luana u përfshi në një përplasje me fansin e saj Besmir Lila, i cili e përndiqte prej 8 muajsh./ BoldNews
