Njerëz të sëmurë, që jeta i ka përplasur pa fund dyerve të spitalit dhe që tani, në kulmin e dëshpërimit, arrijnë deri aty sa të kërkojnë rikthimin e kohës së Enver Hoxhes. Sepse në atë kohë, sipas tyre, kishte më respekt për jetën e njeriut.
“Çdo dy ditë vdes një pacient në atë pavion. Të jetë ilaçi në magazinë dhe të mos jepet… Më kanë thënë, person i brendshëm, që ilaçi është. O ata bëjnë matrapazllëqe dhe e shesin diku tjetër ose nuk arrijnë që me lekët që ka shteti të marrin aq doza sa duhet”.
“Velcade” është emri i kimiopreparatit që mban peng dhjetëra të sëmurë në shërbimin e hematologjisë. Aktualisht ky shërbim ka mbetur zbuluar për medikamente duke filluar nga antibiotikët e deri te citostatikët. “Velcade”, por jo vetëm. Është një listë jo e vogël medikamentesh, tejet të shtrenjta që spitali nuk po mund t’ua sigurojë pacientëve, si “Endoxan” apo “Mabthera”.
G.D, 61 vjeçe, gjendet sot e shtruar në shërbimin e hematologjisë në QSUT. Pacientja, me diagnozë Mielomë Multiple, nuk ka mundur që të mbyllë asnjëherë ciklin e kimioterapisë pa mungesa. Bashkëshorti i saj P.D, tregon për “Shëndet+”, gjithë kalvarin e stërmundimeve për t’i siguruar gruas së tij ilaçet, që nga takimet në ministri, takimet me deputetë e deri te marrëdhënia me magazinieret e farmacive të spitalit.
“Gruaja është shtruar në pavion me datë 18/10/2016 dhe ka dalë me datë 3/11/2016, sipas edhe kartelës, e ka bërë vetëm një herë Velcaden, vetëm 1 flakon. Ka pasur raste që kemi qëndruar edhe një muaj e gjysmë në spital se nuk ka pasur. Nuk ke ku rri 1 muaj e gjysmë në spital se nuk ke ku të lahesh, se nuk ka dush, të zënë morrat. As tani që po flasim nuk ka “Velcade”, shprehet bashkëshorti i pacientes.
Atë që nuk e ofron spitali, e ofrojnë farmacitë private, në mënyrë krejt të jashtëligjshme. P.D tregon një copë letër ku është shkruar emri i farmacisë private që e ka “Velcade”-n dhe numrin e telefonit.
“I bie Tiranës rreth e rrotull dhe më thonë që e kemi pasur ilaçin, por nuk na e lejojnë. Dhe vetëm një farmaci e ka. E kemi ilaçin thotë farmacia: 2100 euro një flakon. Gruas i duhen 3 flakonë në muaj.
“Marr 13 mijë lekë të reja pension, si mund t’ia dal unë këtu në spital kur ajo është invalide prej 10 vjetësh. Gruaja po e mori ilaçin, është 63 vjeçe, fluturon.
Në Ministrinë e Shëndetësisë është hapur një zyrë ankesash, në katin e parë, ku dhjetëra qyetarë, çdo ditë, shkojnë dhe shënojnë kërkesë/ankesën e tyre. Kjo “zgjidhje”, veç të tjerash, ka shmangur edhe kontaktin e drejtpërdrejtë të ministrit me pacientët.
“Shkova në ministri dhe më lanë një numër protokolli, numër 21, një datë dhe shkoj prapë. Asnjë gjë. Del një vajzë e burimeve njerëzore dhe ia shpjegoj gjithçka, gjithë gjendjen e gruas. I thashë që si s’të vjen rëndë nga ajo karrige që të mban sipër. Duhet t’u kisha nxjerrë bojën, se kështu e duan këta lloj njerëzish.
Takoj një deputet te stacioni i Trenit. Bëri sikur foli me Beqajn dhe më tha shko nesër se do të të presë në ministri. Shkova dhe më thanë se Beqaj është me delegacionin turk. Shkoj të premten, po ashtu. Turp më të madh nuk ka. Është ilaç që mund të lesh 5 mangët, por këtë fute. Këta duan që të vdesësh, nuk duan të jetosh”.
Brenda një pavioni, disa e marrin shërbimin, disa të tjerë jo.
“Shkoj te magazinerja e spitalit. E njoh prej 10 vitesh dhe më thotë jam e ndershme. I thashë: Po ilaçin asaj të Pogradecit që të foli mjekja x për të, ia dhe? Po. Atëherë si qenke e ndershme ti? Ilaçin e gruas që është me kancer të zëntë ty, jo atë. Dhe ilaçin e keni brenda. S’kam pasur frikë në kohën e Enverit. Jemi bërë të thërrasim: Ku je, Enver?!” Më flasin të shtëpisë dhe të fisit. Më thonë, do të të vrasin. Le të më vrasin, por të më japin të drejtë.
“Ne shtrohemi në hematologji 1 herë në 18 ditë. Kemi fëmijë dhe i kemi bërë copë-copë. Gruaja është operuar një herë në onkologjik. Ndenji tre ditë dhe ka dalë. Është histori e gjatë puna e kësaj. Bëja analizat në shtet i dilnin mirë, i bëja në privat i dilnin keq. Ku të vesh, o i zi? Si është e mundur, më thoshte mjeku. Po habitem. Ku kisha unë fuqi që të përballoja shpenzimet. Të rrish 11 vjet në spital. Çdo dy ditë vdes një në atë pavion. Dje ndërroi jetë njëri që erdhi nga Saranda”
Burime jozyrtare pranë këtij shërbimi thonë për “Shëndet plus” se është e vërtetë që në pavionin e hematologjisë aktualisht mungojnë shumë medikamente.
“Është e vërtetë që mungojnë shumë ilaçe. Pacientët kanë të drejtë”.
Qsut-ja ka blerë 3 herë Velcade për 2016-n
Sipas të dhënave në portalin Open Data Albania, rezulton se QSUT ka bërë 3 herë blerje të këtij medikamenti. E megjithatë, të sëmurët vazhdojnë të mos e marrin ilaçin prej muajsh. /Shendeti.al/
