Gjykata Kushtetuese ka rrëzuar kërkesën e Enkeleida Hoxhës për shfuqizimin e vendimit të KLGJ-së, që e shkarkoi atë nga detyra e gjyqtares.
Në vendim, Kushtetuesja shprehet se kërkesa nuk është në kompetencën dhe juridiksionin e Gjykatës Kushtetuese, prandaj ajo nuk mund të kalojë për shqyrtim në seancë plenare.
Sipas Gjykatës Kushtetuese, kompetenca për shqyrtimin e ankimeve kundër vendimeve të shkarkimit të gjyqtarëve i ka kaluar juridiksionit disiplinor të KPA-së. GJK sqaron se kërkuesja ka paraqitur të njëjtën kërkesë edhe në Kolegjin e Posaçëm të Apelimit.
Enkeleida Hoxha është arrestuar nën akuzën për përfshirjen në një skemë korruptive në Gjykatën e Krujës, së bashku me disa zyrtarë të tjerë.
Para arrestimit, erdhi dhe kërkesa nga ILD për shkarkimin e saj nga detyra, që u pranua nga KLGJ.
